Hökumətin yeni təklifi nə vəd edir: Vətəndaşa iş, sahibkara işçi, büdcəyə əlavə gəlir

Hökumətin yeni təklifi nə vəd edir: Vətəndaşa iş, sahibkara işçi, büdcəyə əlavə gəlir

Həm işəgötürən qazanacaq, həm işçi, həm də dövlət

 

Xəbər verdiyimiz kimi, Əmək və Əhalinin Sosial Müdafiəsi Nazirliyi (ƏƏSMN) işəgötürənlərə səmərəli xidmət təklif edir. Belə ki, yeni proqram əsasında işə götürülən işçinin əməkhaqqının 50 faizini İşsizlikdən Sığorta Fondu maliyyələşdirəcək. Bunun üçün işəgötürənlər Dövlət Məşğulluq Xidməti tərəfindən göndərilmiş şəxsləri əmək müqaviləsi bağlayaraq müvafiq işlə təmin etməlidirlər.

 

AYNA-nın əməkdaşı əmək qanunvericiliyi və sosial hüquq üzrə ekspert Ruslan Hümbətovla yeni qaydanın incəlikləri barədə həmsöhbət olub.

Ekspert əvvəlcə yeni qaydanın işəgötürənlərə xeyrindən danışıb: “Bu gün əmək bazarında elə sahələr var ki, işçi tapmaqda çətinliklərlə üzləşir. Çünki bizdə alt baza hələ formalaşmayıb. Məşğulluq xidmətləri də indi təlimlər keçməklə həmin bazanı formalaşdırmağa başlayıb. Məsələn, işsiz şəxslərə aşpaz, xarrat, dülgər, satıcı və s. peşələr üzrə təlimlər keçərək işəgötürənlərə yönləndirirlər. İşəgötürən də artıq təhsili, təcrübəsi olan şəxsi işə götürür, işi sıfrdan öyrətmir. Yəni bundan sonra işəgötürən kadr tapmaqda əlavə vaxt itirməyəcək”.

 

“Bunun ikinci tərəfdən müəssisələrə xeyri odur ki, işə götürülən şəxsin əməkhaqqının yarısını Fond ödəyəcək. Yəni, müəssisə ən azından maliyyə resurslarına qənaət edəcək” – deyə R.Hümbətov əlavə edib.

 

Müsahibimiz yeni proqramın işçilərə nə kimi müsbət təsiri olacağına da aydınlıq gətirib: “Çox insan harada iş axtarmağı, iş üçün kimə müraciət etməyi bilmir. Ancaq bundan sonra onlar iş tapmaqda çətinlik çəkməyəcəklər. Çünki məşğulluq xidmətləri onları istiqamətləndirəcək, təyinat üzrə birbaşa iş yerlərinə yönləndirəcək. İşçilər vaxt itkisi ilə də üzləşməyəcəklər, həmçinin, ən azı, 6 ay və ya bir il maddi təminatları olacaqlarını biləcəklər”.

 

ƏƏSMN tərəfindən bildirilir ki, proqramın icrası zamanı əlilliyi olan şəxslərə, gənclərə, cəzaçəkmə müəssisəsindən azad edilmiş şəxslərə və bir ildən artıq işsiz kimi qeydiyyatda olan şəxslərə üstünlük veriləcək: "İşəgötürənlər, adətən belə şəxslərə iş verməkdə tərəddüd edirlər. Çünki həmin şəxsin qabiliyyətinə bələd olmurlar, işin öhdəsindən nə dərəcədə gələcəyini bilmirlər. Ancaq həmin şəxslər məşğulluq xidmətləri tərəfindən göndərildikdə, işəgötürən bir qədər rahat olacaq. Biləcək ki, həmin şəxs təlim keçib, işə yararlıdır, əks halda təlimdə sona qədər iştirak edə bilməzdi”.

 

“İkinci tərəfdən də dövlətin bununla bağlı müəyyən kvotası var, həmin kvotanı ödəməyən müəssisələr müəyyən məbləğdə cərimə olunur. Belə olan halda işəgötürənlər dağa-daşa düşüb əlillliyi olan şəxs axtarmayacaq və inzibati məsuliyyətdən azad olacaqlar” – deyə o vurğulayıb.

 

Ruslan Hümbətov yeni proqramın dövlətə xeyrini də şərh edib: “Dövlətin də bu məsələdə xeyrləri var. İlk növbədə dövlətin sosial siyasəti həyata keçiriləcək. O cümlədən bunun dövlət büdcəsinə xeyri olacaq, yəni vergi ödənişləri, həmçinin Dövlət Sosial Müdafiə Fonduna edilən ödənişlərin məbləği artacaq. Çünki bundan sonra işəgötürənlər işçiləri rəsmi qaydada, əmək müqaviləsi ilə işə götürməkdə maraqlı olacaqlar”.

 

Qeyd edək ki, yeni xidmət “Məşğulluq haqqında” Azərbaycan Respublikası Qanununun 25-ci maddəsinə əsasən həyata keçiriləcək.

Müəllif: Rumiyyə Miraslan      5 İyul 2019 10:00
Cəmiyyət bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin