Türkiyədən uzanan qardaşlıq əlini niyə tutmuruq?

Türkiyədən uzanan qardaşlıq əlini niyə tutmuruq?

Uzaq-uzaq ölkələrdən turist cəlb etmək niyyətimizi ifadə edirik, amma qardaş ölkənin istəyinə cavab vermirik

 

Türkiyənin Burdur və Dənzili şəhərlərinin bələdiyyə və valilikləri Azərbaycanın müxtəlif şəhərləri ilə qardaşlaşmaq, əməkdaşlıq etmək istəyir. Məsələn, Burdur Bələdiyyəsi Şəki şəhəri ilə qardaşlaşmaq arzusundadır.

 

Bu barədə, Burdur şəhərində səfərdə olarkən, politoloq Elxan Şahinoğlu məlumat əldə edib. Ona bildirilib ki, bununla bağlı Burdur Bələdiyyəsindən Şəki Şəhər İcra Hakimiyyətinə göndərilən məktuba, uzun zamandır cavab ala bilmirlər.

Burdur Bələdiyyəsindən bildiriblər ki, Şəkidə “Burdur evi”nin, Burdurda isə “Şəki evi”nin açılmasını istəyirlər. Amma bu təşəbbüs hələ də qarşılıqsız qalıb.

 

Biz turizmə beləmi dəstək veririk? Uzaq-uzaq ölkələrdən turist cəlb etmək niyyətimizi ifadə edirik, amma qardaş ölkədən uzanan əli belə, tutmuruq. Təsəvvür edin, təkcə Türkiyənin Dənizli şəhəri ilə Fransadan tutmuş Cənubi Koreyaya qədər qardaşlaşmış şəhərlər var.

 

Əslində, Burdur Bələdiyyəsindən ünvanlanan müraciətə cavab verilməməsi təəccüblü deyil. Çünki Şəki Şəhər İcra Hakimiyyəti, burdan-bura redaksiyasımızın məsələ ilə bağlı sorğusuna cavab vermədi.

 

Azərbaycan Turizm Assosiasiyasının (ATA) rəhbəri Nahid Bağırov AYNA-ya açıqlmasında, dövlət qurumlarının bu cür davranışının yanlış olduğunu deyib: “Bu mövzu ilə, əsasən dövlət məmurları maraqlanmalıdır. Dövlət turizmi inkişaf etdirmək istəyirsə, belə sazişlərdən boyun qaçırmamalıdır. Çünki bunun inkişaf sahəsində böyük xeyirləri var. Biz nə qədər digər dövlətlərə açıq olsaq, o qədər də inkişaf edərik. Hələ bu, kiçik bir elementdir. Sözsüz ki, böyük faktlar da var, diqqət yetirmə lazımdır”.

N.Bağırov, belə tərəfdaşlıqların inkişafa təkan verdiyini qeyd edib: “Əlbəttə ki, belə tərəfdaşlıqlar çox olmalıdır. Çünki bu, ən azından mətbuatda yayılacaq. Türkiyə vətəndaşları da bu haqda eşidib araşdıracaq və maraqlanmağa başlayacaqlar. Bunun əsas effektlərindən biri də budur və ölkəyə çox xeyir verə bilər”.

 

“İlk növbədə turizmə cavabdeh olan Dövlət Turizm Agentliyi bu mövzuya münasibət bildirməlidir və aidiyyatı qurumlara müraciət etməlidir. Sözsüz ki, belə bir hadisə turizmə dəstək verəcəyi üçün, Dövlət Turizm Agentliyi bu işdə maraqlı olmalıdır”, - müsahibimiz əlavə edib.

 

Dövlət Turizm Agentliyinin (DTA) Aparat rəhbəri Kənan Qasımov AYNA-ya açıqlamasında bildirib ki, ölkədə turizmin inkişafı ilə bağlı müəyyən olunmuş strategiyalara uyğun olaraq işlər görülür: “Lakin yerli icra hakimiyyətləri də bu işdə fəal olmalıdır. Dövlət Turizm Agentliyi olaraq turizm siyasətinin maliyyələşdirilməsində komponentlər həyata keçiririk. Yerli icra hakimiyyətləri də bu işdə dəstəklərini əsirgəməmlidir”.

 

Aparat rəhbərinin sözlərinə görə,  turizm zonalarına kifayət qədər turist axını var: “Şəki şəhəri ən vacib turizm zonalarından biridir. Şəkidə yerləşən tarixi abidələr də bizə imkan verir ki, şəhərə daha çox turist cəlb edə bilək. Bu baxımdan Şəki unikal bir zonadır. Ona görə də bu komponentlər bizim üçün çox vacibdir. Çünki regiona kifayət qədər həm yerli, həm də xarici turistlər səfər edirlər. İmkanların artırılması üçün də müəyyən işlər görülür”.

 

“Dünyanın əksər yerlərində bu qardaşlıq modelindən istifadə olunur. Lakin nəticə real olacaqmı - ilk növbədə o qiymətləndirilməlidir. Lakin bizim üçün ən vacib məsələ spesfik şəhərlərdə onların tələblərinə cavab verən marketinq fəaliyyəti həyata keçirməkdir. Bununla bağlı müəyyən hədəflərimiz var. Eyni zamanda onların tələb və istəklərinə uyğun olaraq yerli məhsulların hazırlanması nəzərdə tutulur. Lakin bu, bizim strategiyamızın əsas hədəflərindən deyil. Buna baxmayaraq bu cür təşəbbüsləri dəstəkləyirik”, - K.Qasımov qeyd edib.

 

Milli Məclsin Mədəniyyət komitəsinin üzvü Aqil Abbas AYNA əməkdaşı ilə söhbətində deyib ki, şəhərlərin qardaşlaşması ənənəsi təkcə turizmə deyil, həm də mədəniyyətlərin inkişafına təkan verir: “Qardaşlaşmış şəhərlər layihəs hələ sovet ittifaqı dövründən var idi. İzmir Bakı ilə, İğdır Şamaxı ilə qardaşlaşmışdı. Ondan sonrakı dövrlərdə də bu layihə davam edib. Şəkinin icra sturukturları bu barədə diqqətlə düşünməlidir”.

 

“Belə proseslərdə tərəflərin biri ilk addımı atmalıdır. Bu sahədə isə ən çox fəallıq göstərən millət vəkili Qənirə Paşayevadır. Türkiyə və Azərbaycanın mədəni, ədəbi fəaliyyətində aktiv çıxış edir. Şəki Azərbaycanın qədim və özünə məxsus mədəniyyəti və turizmi olan bir şəhərdir. Türkiyə isə turizm üzrə dünyanın ən qabaqcıl ölkələrindən biridir. Bu proses turizm və mədəniyyətin inkişafında böyük rol oynaya bilər. Mən özüm də bununla bağlı araşdırma aparıb məsələ qaldıracam”, - deyə millət vəkili bildirib.

Müəllif: Mərahim Nəsib      22 Oktyabr 2019 13:11
Mədəniyyət bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin