YAP sədrinin müavini: “Gənclərdən ibarət deputat korpusu formalaşdırmaq istəyirik”

YAP sədrinin müavini: “Gənclərdən ibarət deputat korpusu formalaşdırmaq istəyirik”

Əli Əhmədov: “Parlamentin buraxılması islahatların bu sahəyə də şamil edilməsini təmin edəcək”

 

“YAP qərara gəldi ki, qanunverici orqan Prezidentin həyata keçirdiyi islahatlardan kənarda qalmasın. Siyasi Şuranın bütün üzvləri bu məsələdə yekdillik nümayiş etdirdilər. Beləliklə, parlamentin buraxılması üçün Prezidentə müraciət olunması ilə bağlı deputatlara tövsiyə verdik”.

 

AYNA xəbər verir ki, bu açıqlamanı hakim Yeni Azərbaycan Partiyasının (YAP) sədr müavini - icra katibi Əli Əhmədov bu gün gün keçirilən mətbuat konfransında verib. O deyib ki, hakim partiya vətəndaş maraqlarını bütün maraqlardan üstün tutaraq qanunverici orqanın yenilənməsini zəruri hesab edir: “YAP Prezident İlham Əliyevə müraciət edərək parlamentin buraxılmasını xahiş edib. Parlamentin buraxılması islahatların bu sahəyə də şamil edilməsini təmin edəcək”.

“Qərarla bağlı parlamentə məktub ünvanlanacaq. Müraciət imzalanıb və yaxın zamanlarda parlamentə göndəriləcək. Yaxın zamanlarda plenar iclasın gündəliyinə salınacağına inanıram. Qəbul edilən qərara qeyri-adi qiymət verməyə ehtiyac yoxdur. Bu, islahatların genişlənməsinin bir növüdür. İnanıram ki, qərar parlamentdə yeni ənənənin formalaşmasına öz töhfəsini verəcək”, - Ə.Əhmədov bildirib.

 

“Növbəti parlament seçkilərində müasir, vətənpərvər gənclərdən ibarət deputat korpusunun formalaşdırılması bizim diqqətimizdədir. Həyata keçirilən islahatların başında bir çox əhəmiyyətli səbəblər dayanır. Azərbaycanda çox savadlı, müasir dünyagörüşə sahib olan layiqli gənc nəsil formalaşır. Hesab edirəm ki, bu gənc nəsil Azərbaycanın bundan sonrakı inkşafına böyük töhfə verəcək. Biz gənclərimizlə qürur duyuruq”, - o, əlavə edib.

 

Sədr müavini qeyd edib ki, Yeni Azərbaycan Partiyasının bu günə qədərki praktikasına görə parlament seçkiləri ilə bağlı hər hansı qurultay keçirilməsinə zəruri ehtiyac yaranmayıb: “YAP-ın qərar qəbul etməsi üçün strukturları var”.

İcra katibi növbəti parlament seçkilərində hakim partiyanın namizədlərinin say çoxluğu ilə təmsil olunması ilə bağlı suala da cavab verib: “Hər bir partiya istəyər ki, seçkilərdə daha çox sayda namizədlə parlamentdə təmsil olunsun. Layiqli namizədləri müəyyənləşdirmək əsasdır. Hər bir seçkinin taleyini, çox sayda üzvümüzün təmsil olunmasını seçicilərimiz müəyyənləşdirəcək. Seçiciləri inandırmaq lazımdır ki, onların maraqlarını və mənafelərini daha yaxşı təmin edə bilərik”.

 

“Azərbaycanda yeni parlamentin səlahiyyətləri qüvvəyə mindikdən sonra köhnə parlamentin səlahiyyətləri bitmiş hesab olunur. Bu barədə Azərbaycan Konstitusiyasında qeyd edilib. Növbəti parlament seçkilərinin vaxtını Azərbaycan Prezidenti müəyyən edir”, - deyə Əhmədov vurğulayıb.

 

Xatırladaq ki, bu gün YAP Siyasi Şurasının təcili iclasında Milli Məclisin buraxılması ilə bağlı qərar qəbul edilib. Qərar mövcud parlamentin dövlət başçısının hazırda həyata keçirdiyi siyasətə adekvat olmaması və son aylar ölkədə aparılan islahatlardan geri qalması ilə əsaslandırılıb.

Müəllif: Ayna.az      28 Noyabr 2019 16:18
Siyasət bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin