Sərhədçilərə qarşı ittiham: Camaatı "dağa" dırmandırırlar

Sərhədçilərə qarşı ittiham: Camaatı "dağa" dırmandırırlar

Osman Gündüz: “Minik maşınında olan sərnişinlər maşından düşürülür və təxminən 800 metr uzunluğunda, “dağa dırmaşan” piyada keçidinə yönləndirilirlər”

 

“Bir neçə gün öncə Gürcüstana keçmək üçün yenidən Balakəndəki Mazımçay sərhəd buraxılış məntəqəsində oldum. Buradakı gömrük postunda, gömrük infrastrukturunda xeyli işlər görülüb. Giriş və çıxış yoxlama yerləri ayrılıb. Ölkəyə giriş üçün əlavə infrastruktur yaradılıb. Əməkdaşların sayı xeyli artırılıb. Yeni əməkdaşlar cəlb edilib. Güman ki bu səbədən, yeni əməkdaşlar sənədləşmə prosesini xeyli ləng icra edirdilər”.

AYNA xəbər verir ki, bu barədə Milli İnternet Forumunun (MİF) prezidenti Osman Gündüz sosial şəbəkədə paylaşım edib. O, gömrükdən fərqli olaraq Dövlət Sərhəd Xidməti (DSX) ilə əlaqəli işlərdə isə heç bir yenilik müşahidə etmədiyini yazıb: “Əksinə, daha da pisləşib. Kənardan monitorinq apararaq müəyyən etdim ki, minik maşınında olan sərnişinlər birmənalı olaraq sərhədçilər tərəfindən maşından düşürülür və təxminən 800 metr uzunluğunda, “dağa dırmaşan” piyada keçidinə yönləndirilir. Bu, qoca və cavana, uşaq və xəstəyə, yağışı və ya günəşli havaya baxmadan icra olunur”.

 

“Mənə növbə çatanda, nəhəng dəmir darvazanın yanında dayanan sərhədçi yanımdakı sərnişinlərin düşməsini tələb etdi. Mən, təbii ki, imtina etdim. Və həmin 800 metr məsafədə olan postdan təcili xəbər gəldi ki, hamısı maşında gələ bilər. Postda bunun nə üçün belə olması, sərnişinlərin nə üçün maşından düşürülməsi ilə bağlı sualıma isə hər hansı ciddi səbəblər göstərə bilmədilər” – o yazıb.

 

O.Gündüzün sözlərinə görə, postda paralel yoxlamalar yenə davam edir: “Dövlət Gömrük Kmitəsi və Dövlət Sərhəd Xidməti sənədləşmə işlərini, eyni işləri yenə də paralel olaraq aparır. Hərəsinin öz təlimatı var. İnformasiya sistemləri də indiyədək inteqrasiya olunmayıb. Belə anladım ki, DGK və DSX generallarının tez-tez görüşməsinin hələlik hər hansı müsbət nəticəsi olmayıb, əksinə daha da pisləşib. Düşünürəm ki sərhəd buraxılış məntəqəsində işlərin daha da yaxşılaşması, keçid prosesinin sürətlənməsi, gömrük və sərhəd buraxılış prosedurlarının sadələşdirilməsi üçün mütləq şəkildə qanunvericilik dəyişməlidir”.

Müəllif: Ayna.az      3 İyul 2019 13:00
Cəmiyyət bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin