Yeni fond yaradılması təklifi cəmiyyəti “razılar” və “narazılar”a ayırıb

Yeni fond yaradılması təklifi cəmiyyəti “razılar” və “narazılar”a ayırıb

Ombudsmanın təklifinə qarşı çıxanlarla yanaşı, bu addımın müsbət nəticələr doğuracağını düşünənlər də var

 

Bir neçə gün öncə Ombudsman Elmira Süleymanova Aliment Fondunun yaradılması ilə bağlı Milli Məclisə müraciət etdiyini açıqlayıb. O, bu məsələni bir neçə dəfə illik məruzəsinə də daxil etdiyini deyib.

“Aliment Fondunun yaradılması zəruridir. Çünki ölkədə boşanmaların sayı kritik vəziyyət alır. Aliment Fondu Dövlət Sosial Müdafiə Fondu kimi bir fond olacaq. Boşanan insanlar məhkəmə qərarından sonra bu Fonda müraciət edərək aliment pulunu ala biləcəklər. Sonra isə dövlət həmin borcludan məcburi qaydada müəyyən bir prosedurla həmin vəsaiti alacaq. Ümid edirik ki, Aliment Fondunun yaradılması öz müsbət həllini tapacaq”, - Süleymanova bildirib.

 

Ombudsmanın bu açıqlaması cəmiyyətdə birmənalı qarşılanmayıb. Bəziləri bu ideyanı müsbət dəyərləndirsələr də, belə bir fondun yaradılmasına qarşı çıxanlar da var.

 

Məsələn, yazar, jurnalist Şəbnəm Karslı sosial şəbəkə hesabında məsələyə belə münasibət bildirib: “Aliment Fondu yaradılır. Adam bilmir gülsün, ya ağlasın. Təsəvvür edin ki, boşanmaq fikriniz yoxdur, amma sizin vergi ödədiyiniz büdcədən Aliment Fonduna pul ayrılacaq. Bir zırrama da ildə bir arvad alıb boşayacaq və onun uşaqlarına alimenti dövlət ödəyəcək. Niyə? Baxıma möhtac olan əngəllilər, azyaşlı uşaqlar, kimsəsizlər və bu kimi dövlətin qayğısına ehtiyacı olanlar üçün daha çox məbləğ ayrılmalı, büdcə buna yönəlməlidir. Yoxsa hansısa övladına sahib çıxmayan bivecin əkib-törədiyi uşaqlarına yox”.

Yeni təklifi AYNA-ya şərh edən sosioloq Əhməd Mansurov isə hesab edir ki, Aliment Fondunun yaradılması birbaşa uşaq müdafiə sisteminə yönəlmiş addımdır: “Cəmiyyətdə olan bütün uşaqların bərabərhüquqlu inkişafı üçün dövlət tərəfindən dəstək göstərilməlidir. Adətən bu dəstək ya uşaqlar üçün olan dövlət müəssisələri - internat məktəbləri, ya da uşaq evləri vasitəsilə həyata keçirilir. Aliment Fondu yarandıqdan sonra isə, aliment ödəməyən valideynlərin uşaqlarına bu dəstək göstəriləcək. Bir valideynin alimenti ödəməməsi və ya ödəyə bilməməsi normal hal deyil. Lakin buna baxmayaraq uşaqlar pulsuzluğa görə internata düşməməlidir, onlar ailədə, ən azından valideynlərindən birinin yanında böyüməlidirlər”.

“Valideynin aliment ödəmədiyi hallarda, digər valideyn, xüsusilə ana üçün övlad böyütmək, uşaqların normal fizioloji və təhlükəsiz inkişafı çətin olur. Belə hallarda təkvalideynli ailələrin uşaqlarının uşaq evlərinə verilməsi problemi meydana çıxır. Bu, nə dərəcədə normaldır? Ailədə bir valideyn varsa və o, öz uşağını saxlamağa hazırdırsa, onu niyə müəssisələrə verək, axı? Bəs o uşaqların gələcəyi? İnternat və  uşaq evlərində böyüyən insanların taleyi hər zaman çətin olur. Onlarda sosial  vərdişlər, bacarıqlar, emosional hazırlıq, həyata uyğunlaşma məsələləri natamam olur”, - deyə Ə.Mansurov qeyd edib.

 

Sosioloq əlavə edib ki, uşaqların normal inkişafı yalnız ailə mühitində baş verə bilər: “Bir valideyn aliment ödəmir və ya ödəmək istəmirsə, digəri uşağa öz yanında qayğı göstərmək istəyirsə, Aliment Fondu bu problemi həll edəcək. Bu isə uşağın gələcəyi üçün çox yaxşı bir addımdır”.

Müəllif: Təranə Xudabaxşiyeva      22 İyul 2019 13:00
Cəmiyyət bölməsinə aid digər xəbərlər
Ən çox oxunanlar

Ən son xəbərləri səhifəmizdən də izləyin