“NATO-nun sammitində ABŞ-ın Avropadakı hərbi mövcudluğunun gələcəyi müzakirə olunacaq”
İyunda NATO-nun Haaqada keçiriləcək sammitinin iştirakçıları ABŞ-ın Avropada hərbi mövcudluğunun gələcək formatını müəyyən edəcəklər. AYNA.AZ xəbər verir ki, bu barədə Estoniyanın müdafiə naziri Hanno Pevkur Estoniyanın ERR milli ictimai yayımına müsahibəsində deyib.
"Haaqa sammiti ABŞ-ın Avropadakı hərbi strategiyasının necə görünəcəyini, növbəti addımların necə olacağını müəyyənləşdirəcək. ABŞ-ın Avropadakı hərbi mövcudluğu yenidən nəzərdən keçiriləcək", - Pevkur bildirib.
Nazir qeyd edib ki, ABŞ Prezidenti Donald Tramp sammitdə israr edəcək ki, NATO ölkələri hərbi xərclərini öz ÜDM-lərinin 5%-i qədər artırsınlar. Estoniya öz növbəsində Amerika administrasiyasının bu yanaşmasını dəstəkləyir və bunu ədalətli hesab edir; 2026-cı ildə ölkənin müdafiə xərcləri ÜDM-in 5,4%-nə çatmalıdır.
Pevkur vurğulayıb ki, onun fikrincə, Vaşinqtonun ritorikasında və hərəkətlərində müəyyən dəyişikliklərə baxmayaraq, ABŞ Avropanın əsas müttəfiqi olaraq qalır: “Çox şey Ukraynadakı münaqişənin necə həll olunacağından asılı olacaq. Eyni zamanda, Avropa İttifaqında belə bir anlayış var ki, Trampın rəhbərliyi altında ABŞ-ın diqqəti Vaşinqton üçün prioritetə çevrilən Hind-Sakit okean regionuna doğru dəyişir”.