Azərbaycan mediası məlumatları bayağı plagiata çevirən “copy-paste” ilə məşğuldur
Laçın-Xankəndi yolunda azərbaycanlı eko-fəalların dinc etiraz aksiyası bir ayını tamamlayır. Soyuq havaların başlamasına baxmayaraq aksiya iştirakçıları döyüş ruhunu qoruyub saxlayır, vətənpərvərlik mahnıları oxuyur və aksiyanın qalibiyyətlə sona çatması əzmində olduqlarını nümayiş etdirirlər.
Amma aksiya təşkilatçılarının böyük ruh yüksəkliyinə baxmayaraq, beynəlxalq aləmdə erməni lobbisinin sanksiya tətbiqinə qədər dünya dövlətlərindən Azərbaycanın addımlarını pisləməyə çalışan fəallıq nəzərə çarpır. Xarici mətbuatın monitorinqinə və Avropa siyasətçilərinin sosial şəbəkələrdəki profillərinə əsasən, beynəlxalq ictimaiyyət əmindir ki, azərbaycanlı eko-fəalların etiraz aksiyası Xankəndidə yaşayan ermənilərin “tam blokadasına” səbəb olub.
Ən son belə materialı BBC yayıb. Məqalə müəllifi işğal altında olan Xankəndi sakini ilə telefonla əlaqə saxlayıb və onun sözünə inanaraq, belə qənaətə gəlib ki, Azərbaycan Qarabağın “120 minlik” əhalisini “mühasirədə saxlayır”.
Bu rəqəmin müxtəlif dünya mediası və siyasətçilərinin açıqlamalarında tez-tez təkrarlanması artıq erməni tərəfi üçün öz bəhrəsini verməkdədir. Biz bilirik ki, 44 günlük müharibədən sonra orada maksimum 15-20 min insan yaşayır. Amma Osmanlı İmperiyasında ən çoxu 1,2 milyonu yaşasa da, bədnam 1,5 milyon erməninin “soyqırımı qurbanları”nın sayı kimi, 120 min rəqəmi də Avropa siyasətçilərinin leksikonunda yer alır.
Bu, daha bir tendensiyadır ki, onunla nə qədər gec deyil, mübarizə aparılmalıdır ki, sonradan “azərbaycanlılar bədbəxt 120 min ermənini Qarabağdan necə qovdular” ittihamları ilə üzləşməyək.
Bu arada, Azərbaycan hələ də erməni lobbisinin informasiya hücumlarının qarşısını ala bilməyib və ekoloji fəalların aksiyasını keçirmə səbəbləri ilə bağlı ciddi arqumentləri xarici auditoriyaya çatdıra bilməyib.
Xarici KİV-lər Ermənistan rəsmilərinin və Qarabağ separatçılarının rəhbərlərinin Xankəndi əhalisini “humanitar fəlakət” həddinə çatdıran “blokada” ilə bağlı giley-güzar sızlamaları xəbər və müsahibələrlə doludur. Bəzi Azərbaycan diplomatları bu informasiya hücumlarına adekvat cavab verirlər, lakin bu, kifayət deyil.
Azərbaycanın ədalətli etirazı beynəlxalq auditoriyanın diqqətinə çatdırılmayıb və erməni lobbisi bu boşluqdan öz məkrli məqsədləri üçün məharətlə istifadə edir, Bakını Qarabağ ermənilərinə zülm etməkdə ittiham edir. Ölkəmizdə ekoloji fəalların aksiyası, dünya miqyasında hay-küy salan separatçı rəhbərliyin əməlləri barədə məlumatlar əsasən daxili auditoriyaya yönəlib.
Yalnız bəzi Türkiyə, İsrail və Pakistan mediası informasiya hücumuna qarşı durmağa çalışır - müttəfiqlik münasibətləri özünü hiss etdirir. Amma əksər Avropa və Amerika ölkələrinin mətbuatında biz təəssüf ki, erməni lobbisinə uduzuruq.
Mövcud vəziyyət obyektiv informasiyanın beynəlxalq auditoriyaya çatdırılmasında Azərbaycan jurnalistikasının roluna yenidən baxmağı tələb edir. Azərbaycan mediası bu sahəni öz maraqlarına xidmət edən strukturlara çevirən Əli Həsənov və Ramiz Mehdiyevin kuratorluğundan qurtulsa da, bu mənfi tendensiya hələ də davam edir. Mətbuat Şurasının rəhbərliyi dəyişib, amma hadisələrin gedişatına baxanda media kapitanlarının hələ də “yuxarı”dan göstəriş gözlədiklərinin şahidi oluruq.
Hələ İkinci Qarabağ müharibəsi başlamamışdan əvvəl medianın fəaliyyətinə cavabdeh olan məmurlar informasiya müharibəsini düzgün aparmırdılar. Bu, xidmətləri hətta layiqincə qiymətləndirilməyən ayrı-ayrı jurnalistlərin üzərinə düşmüşdü. Onlar dövlətdən heç bir kömək gözləmədən düşmənin yalanlarını, Ermənistanın təbliğat miflərini ifşa etdilər. Onların potensialından hələ də lazımınca istifadə olunmayıb. Və əksər hallarda Azərbaycan mediası məlumatı bayağı plagiata çevirən “copy-paste” ilə məşğuldur.
Azərbaycan əraziləri işğaldan azad edildikdən sonra erməni işğalının bütün dəhşətlərini və Azərbaycan hakimiyyətinin işğaldan azad edilmiş torpaqları dirçəltmək niyyətini öz gözləri ilə görmək üçün xarici ölkələrdən çoxlu jurnalistlər ora dəvət olunub. İndi nə mane olur ki, eko-fəalların etiraz aksiyasını işıqlandırmaq üçün xarici jurnalistləri dəvət etsinlər və onlar növbəti erməni yalanına yenidən əmin olsunlar?
Əgər “sülhməramlılarla” danışıqlar aparmaq və Xankəndinə çıxışı təmin etmək mümkündürsə, elə həmin BBC jurnalistini ekoloji fəalların aksiyasına dəvət etmək olar. Qoy əvvəlcə aksiya iştirakçıları ilə görüşsün, sonra isə Xankəndidə mal qıtlığı görüntüsü yaratmaq üçün əvvəlcədən yerə düzülmüş ərzaqları və bu səbəbdən boşalmış mağaza rəflərini öz gözləri ilə görsün.
Azərbaycan tərəfi dəfələrlə bəyan edib ki, Laçın dəhlizi Ermənistan ordusunun silah və hərbi hissələrinin daşınması üçün deyil, yalnız humanitar məqsədlərə xidmət edir. Azərbaycanlı mütəxəssislərin Rusiya sülhməramlı kontingentinin müvəqqəti yerləşdirildiyi zonada faydalı qazıntı yataqlarına nəzarət etmək hüququ var. Beynəlxalq hüquqa görə, Qarabağ Azərbaycanın ayrılmaz hissəsidir, suverenlik və qanunvericiliyinə tabedir.
Bəs nə üçün əhəmiyyətli media resurslarına malik Azərbaycan tərəfi Xankəndinin “blokadası” ilə bağlı erməni yalanını dağıda bilmir? Hesab edirik ki, bu suala təkcə “yüksək peşəkarlıqlarını” açıq elan edən, lakin milli maraqlardan söhbət gedəndə təvazökarlıqla susmağa və ya yuxarıdan işarə gözləməyə üstünlük verən bir çox media nümayəndələri deyil, həm də bu işarəni verənlər cavab verməlidir...