Panaqiotopoulos: "Hakimiyyət ölkənin müdafiə sistemlərinin zəifləməsinə razı olmayacaq"
Yunanıstan Krit adasında quraşdırılmış S-300 zenit-raket komplekslərini Ukraynaya ötürməyəcək. AYNA xəbər verir ki, məsələ ilə bağlı rəsmi Afinanın mövqeyini "ERT 1" telekanalına müsahibəsində ölkənin milli müdafiə naziri Nikos Panaqiotopulos açıqlayıb.
Nazir bildirib ki, Afina həssas məsələdə çəkinir. Onun sözlərinə görə, S-300-lərin Kiyevə təhvil verilməsi Türkiyənin təhdidləri qarşısında ölkəni zəiflədəcək.
Afinaya səfər edən ABŞ dövlət katibi Antoni Blinkenin S-300-lərin Kiyevə göndərilməsi ilə bağlı hər hansı müraciət olub-olmaması ilə bağlı sualı cavablandıran Panaqiotopulos deyib, ölkə bu sistemləri müəyyən səbəblərə görə alıb: "S-300-lərin mövcudluğu bizə lazımdır. Hakimiyyət ölkənin müdafiə sistemlərinin zəifləməsinə razı olmayacaq".
Bundan əvvəl bildirilmişdi ki, fevralın 22-də Salonikidə ABŞ dövlət katibinin Yunanıstana səfərinə etiraz aksiyası keçirilib. Yunanıstan Kommunist Gəncliyinin üzvlərinin nümayişə gəldiyi dəqiqləşdirilib. Onlar ABŞ konsulluğu qarşısında toplaşaraq ölkə hökumətini Ukraynadakı münaqişədə iştirakını dayandırmağa çağırıblar.