Aleksey Juravko da daxil olmaqla iki nəfər ölüb
Xalq deputatlarının keçmiş deputatının Xerson otellərindən birində öldürüldüyü iddia edilir.
Rusiya tərəfindən işğal edilən Ukraynanın Xerson vilayətində Ukraynanın vətən xaini, Rusiyayönlü Regionlar Partiyasından olan keçmiş xalq deputatı Aleksey Juravko sentyabrın 25-də məhv edilib.
AYNA UNİAN-a istinadən bildirir ki, Juravkonun Xerson şəhərinin mərkəzindəki mehmanxanada öldürüldüyü iddia edilir. Bu barədə Xersonun “fövqəladə hallar xidmətinin nümayəndəsi” “İnterfax”a deyib.
Onun sözlərinə görə, otelə Ukraynaya verilən Amerikanın HIMARS raket artilleriya sistemindən atəş açılıb.
Eyni zamanda, “fövqəladə hallar xidməti” atəşə tutulan obyektdə guya heç bir hərbi texnikanın və silahlı şəxslərin olmadığını iddia edib.
“Aleksey Juravko da daxil olmaqla iki nəfər ölüb”, - deyə qeyd olunub.
Qeyd edək ki, avqustun sonunda Ukrayna Silahlı Qüvvələri əks-hücum əməliyyatına başlayıb. Sentyabrın 25-də məlum olub ki, Ukrayna ordusu Rusiya Milli Qvardiyasının Xersondakı mövqelərinə zərbələr endirib.
Aleksey Juravko 21 aprel 1974-cü ildə Dnepropetrovsk vilayətinin Jovti Vodı şəhərində anadan olub. O, Regionlar Partiyasının üzvü olub. 2006-cı il mayın 25-dən 2007-ci il noyabrın 23-dək xalq deputatı olub. 2015-ci ildə Rusiyaya qaçıb. Juravko bu il Rusiyanın Ukraynaya hərbi müdaxiləsinə açıq dəstəyinə görə Rusiya tərəfindən “sülhməramlı” adlandırılıb. Ukraynanın vətən xaini elan edilən Juravko Xerson vilayətində ukraynalıların oğurlanmasında və onlara işgəncə verilməsində iştirak etməkdə ittiham olunurdu.