TƏBİB xaricdəki vətəndaşlarımıza çağırış edib

Aktual

04.09.2020 - 16:24

“Olduqları ölkənin sanitar-epidemioloji qaydalarına ciddi şəkildə riayət etsinlər”

 

Yeni növ koronavirus pandemiyası səbəbindən xarici ölkələrdə, o cümlədən Azərbaycanla qonşu olan ölkələrdə qalmış vətəndaşlarımızın vətənə qaytarılması istiqamətində tədbirlər davam etdirilir. Quru sərhədi ilə Azərbaycana qayıtmaq məqsədilə çoxlu sayda vətəndaşlarımız Rusiya Federasiyasının Dağıstan Respublikası ərazisinə gəlir. Həftəlik əsasda Rusiya Federasiyasının rəsmi orqanları ilə razılaşdırılmış qaydada və xüsusi plana uyğun olaraq vətəndaşlarımızın Samur sərhəd-keçid məntəqəsindən Azərbaycan ərazisinə keçidi həyata keçirilir.

 

Sərhədi keçən bütün vətəndaşlardan Tibbi Ərazi Bölmələrinin İdarəetmə Birliyi (TƏBİB) tərəfindən koronavirus testi üçün nümunə götürülür və onlar karantin məntəqələrinə yerləşdirilirlər.

 

TƏBİB-dən AYNA-ya bildirilib ki, təəssüflə qeyd olunmalıdır ki, avqustun sonuncu həftəsində Rusiyadan quru sərhədi ilə Azərbaycana təxliyə olunmuş vətəndaşlarımızdan götürülmüş testlər nəticəsində 33 nəfərdə COVID-19 infeksiyası aşkar olunub: “Əvvəlki aylarda həyata keçirilmiş təxliyələr zamanı testləri pozitiv çıxmış vətəndaşlarımızın sayı cüzi olsa da, qeyd edilən həftədə kəskin artım müşahidə olunmuşdur. Bu, istər Rusiyanın müxtəlif bölgələrindən Dağıstana gələn, istərsə də orada toplanma məntəqələrində təxliyə gözləyən bəzi vətəndaşlarımızın sanitar-epidemioloji tələblər və təhlükəsizlik qaydalarına riayət etməməsinin nəticəsində baş verir”.

 

“TƏBİB bir daha xarici dövlətlərdə olan və Azərbaycana qayıtmaq istəyən vətəndaşlarımızı həmin ölkənin sanitar-epidemioloji qaydalarına ciddi şəkildə riayət etməyə çağırır”, - deyə məlumatda qeyd olunub.

Müəllif: Ayna.az