Deputat: “ABŞ demokratiya axtarışında olsaydı, Əfqanıstanı yiyəsiz qoymazdı”
Politoloq: “Ukrayna NATO-ya üzv olacaq və Rusiya bunun qarşısını bilməyəcək”
Rusiya Prezidenti Vladimir Putin “Rossiya-1” kanalına açıqlamasında deyib ki, ABŞ və NATO Moskvaya təhlükəsizlik zəmanəti verməkdən imtina edərsə, Kremlin cavabı çox fərqli olacaq. O, Kremlin cavabının rus hərbi ekspertlərin verəcəyi təkliflərdən asılı olduğunu bildirib.
“Rusiya ABŞ və NATO-ya öz təkliflərini “nəyisə ört-basdır etmək və dayandırmaq” üçün deyil, diplomatik danışıqlarda qanunla təsbit olunmuş nəticəyə nail olmaq üçün irəli sürüb. Biz bunun üçün çalışacağıq. Rusiyanın NATO-nun daha da Şərqə doğru genişlənməsinə reaksiyası çox ciddi olacaq”, - deyə Putin vurğulayıb.
Bu arada ABŞ Prezidenti Co Bayden “Telegraph”a müsahibəsində söyləyib ki, 2022-ci il 2021-ci ildən daha pis il olacaq: “Koronavirus pandemiyasının qarşıdakı ildə də davam edəcəyi gözlənilir. Lakin 2022-ci il demokratiyanın inkişafı ili olacaq, demokratikləşmə üçün daha böyük hədəflərə nail olacağıq”.
Milli Məclisin Beynəlxalq münasibətlər və parlamentlərarası əlaqələr komitəsinin üzvü, Azərbaycan Demokratik İslahatlar Partiyasının (ADİP) sədri Asim Mollazadə AYNA-ya açıqlamasında bildirib ki, bu gün dünyada həm Putinin, həm də Baydenin söylədiklərinin əksi olan proseslər gedir: “Onlar özlərini münəccim kimi göstərsələr də, adətən proqnozları özünü doğrultmur. Rusiya uzun illərdir NATO-nu, NATO isə Moskvanı hədələməklə məşğuldur. Vaxtaşırı olaraq dünya müharibəsinin başlayacağını, Ukrayna məsələsinə görə, bir-birilərinə qarşı hərbi əməliyyatlara start verəcəklərini söyləsələr də, bunlar baş vermir. Çünki hər ikisi anlayır ki, bunun axırı nə ilə bitəcək. Bu səbəbdən bu kimi bəyanatlardan təzyiq vasitəsi kimi istifadə edirlər”.
“Putin uzun illərdir Qərbi hədələyir. Amma gözünün qarşısında NATO onun sərhədlərinə doğru irəliləyir. Qərb illərdir Kremli təhdid edir, Putin isə öz işində-gücündədir. Bütün bunlar sadəcə dünya ictimai rəyini çaşdırmaq məqsədi güdür”, - deyə deputat vurğulayıb.
O ki qaldı Baydenin demokratiya açıqlamasına, Mollazadənin fikrincə, ABŞ demokratiya axtarışında olsaydı, Əfqanıstanı yiyəsiz qoymazdı: “Əfqanıstanda ABŞ-dan mərhəmət uman insanlar təyyarənin yedəyindən yapışırdılar. Amerika isə bütün bunlara göz yumurdu. Ərəb dövlətlərini, lap elə Ukraynanın özünü nə günə qoydular… Demokratiya xaricdən idxal olunmur. Bu, faciələrə, təhlükələrə, sabitliyin pozulmasına gətirib çıxarır. Yaxın tarixdə belə halları az görməmişik”.
ADİP sədri əlavə edib ki, nə Putinin, nə də Baydenin bəyanatlarına ciddi yanaşmaq lazımdır: “Nə Putinin dediyi kimi, Rusiya Qərbə qarşı hərbi cəbhə açmağa hazırlaşır, nə də Baydenin söylədiyi kimi, dünya demokratiyaya “hamilədir”. Sadəcə dünyanın nəzərləri onların üzərindədir və bu səbəbdən nələrsə deməlidirlər. Nəsə deməlidirlər deyə belə məzmunsuz açıqlamalar verirlər”.
Aydınlar Partiyası sədrinin birinci müavini, siyasi şərhçi Qroxmaz İbrahimli mövzuya dair AYNA-nın şərhində deyib ki, Rusiya NATO-ya qarşı hücumlarını davam etdirir: “Vaxtilə Gürcüstan məsələsində NATO Moskvaya güzəştə gedib və Kreml bundan sonra Ukrayna məsələsində də oxşar addımlardan istifadə edib. Vladimir Putinin “Rossiya-1” kanalına müsahibəsi zamanı söylədiyi fikirlər bir daha göstərir ki, Moskva heç bir halda postsovet məkanına nəzarəti itirmək istəmir”.
“Ehtimallarım ondan ibarətdir ki, Rusiya Ukraynaya qarşı hərbi hücumlara start verə bilər. Lakin bu, onlar üçün heç də asan başa gəlməyəcək. Bunun qlobal müharibəyə qədər davam edəcəyi və aylarla, illər sürəcəyi ehtimalı var. Bütün hallarda gec-tez Ukrayna NATO-ya üzv olacaq. Rusiya isə bütün mənfur ssenrilərinə rəğmən, buna mane ola bilməyəcək”, - deyə müsahibimiz qeyd edib.
Baydenin demokratikya açıqlamasını şərh edən İbrahimlinin sözlərinə görə, Rusiya başda olmaqla bütün avtoritar rejimlər bir gün tarixə qovuşacaq: “Əgər ABŞ administrasiyası həqiqətən də bu prosesə dəstək vermək niyyətindədirsə və növbəti imitasiyaya yol vermirsə, bu, alqışlanmalıdır. Məhz Rusiya avtoritarizminin nəticəsidir ki, Ukrayna, Gürcüstan və digər keçmiş İttifaq dövlətləri müstəqil siyasət yürüdə bilmir. Nəhayət, Ağ Evin özündə başa düşməyə başlayıblar ki, demokratiyasız dünyanın gələcəyi yoxdur. Lakin buna nə qədər səy göstərəcəklər - bu barədə qəti mülahizə yürütmək mümkün deyil. Bütün bu suallara əlahəzrət zaman cavab verəcək”.