Agent 6 yaşlı qızının çarpayısının altında silah və sursatlar yerləşdirib: ondan “Kalaşnikov”, qumbaralar və çoxlu sayda patron müsadirə edilib
Ukrayna Təhlükəsizlik Xidmətinin əks-kəşfiyyatçıları Zaporojyedə Ukrayna qoşunlarının komandanlığına və xüsusi təyinatlılarına qarşı silsilə terror aktları hazırlayan Rusiya FSB-nin agent şəbəkəsinin daha bir üzvünü saxlayıb.
AYNA xəbər verir ki, Xidmətin yaydığı məlumata görə, saxlanılan rus agenti 6 yaşlı qızının çarpayısının altında silah və sursatlar yerləşdirib.
Qeyd olunub ki, bu il mayın 9-u ərəfəsində kəşfiyyatçılar cənub cəbhə bölgələrində saxlanılan iki agentin ortağını indi Zaporojyedə keçirilən xüsusi əməliyyat zamanı yaxalayıb.
Həmin şəxsdən təchiz olunmuş maqazinləri olan “Kalaşnikov” avtomatı, qumbaralar və çoxlu sayda atıcı silahlar üçün patron aşkarlanıb.
Ukrayna hüquq-mühafizə orqanlarının məlumatına görə, Rusiya şərikləri Zaporojye və cəbhə xətti yaxınlığında terror aktları törətmək üçün məhz bu silahdan istifadə etməyi planlaşdırıblar.
Xüsusilə də onların əsas hədəfləri Ukrayna Silahlı Qüvvələri komandanlığının və Təhlükəsizlik Xidmətinin xüsusi təyinatlı qüvvələrinin nümayəndələri olub.
Müstəntiqlər qeyd ediblər ki, saxlanılan şəxs başqaları ilə ünsiyyətdə Kremlyönlü fikirlərini gizlətməyib, ona görə də Rusiya xüsusi xidmət orqanlarının diqqət mərkəzinə düşüb. Kuratorların göstərişi ilə o, şəxsi mənzilində gizli yer təchiz edib, orada ifşa olunmuş terrorçular qrupu qeydiyyatdan keçməmiş odlu silah və digər məhvetmə vasitələrini gizlədiblər.
Saxlanılan şəxsin yaşadığı ünvanda aparılan axtarış zamanı digər əşyalarla yanaşı, 3 ədəd F-1 və RQD-5 döyüş qumbarası, atıcı silahlar üçün 800-dən çox patron və 2 ədəd RQD-55mç tüstü qumbarası aşkar edilib.
Hüquq-mühafizə orqanlarının əməkdaşları hazırda saxlanılanın əlində olan silahların mənbələrini müəyyən etməyə çalışırlar.
