“Fransa hərbçiləri Ukrayna ərazisinə daxil olduğu təqdirdə onlara zərbə endiriləcək”
“Paris qoşunları Ukraynaya kömək üçün göndərmək qərarına gələrsə, Rusiya ordusu fransız hərbçilərinə hücum etməyə başlayacaq”. AYNA xarici mediaya istinadən bildirir ki, bu sözləri Rusiya Xarici İşlər Nazirliyinin sözçüsü Mariya Zaxarova deyib.
Onun sözlərinə görə, Fransa Prezidenti Emmanuel Makron əsgərlərin döyüş bölgəsinə göndərilməsi ilə bağlı açıqlamaları ilə Rusiya üçün “strateji qeyri-müəyyənlik” yaratmaq istəyir: “Biz onu məyus etməliyik. Bizə görə vəziyyət daha dəqiq görünür. Əgər fransızlar münaqişə zonasında peyda olacaqlarsa, onlar qaçılmaz olaraq Rusiya Silahlı Qüvvələrinin hədəfinə çevriləcəklər”.
Eyni zamanda, Zaxarova Fransa hakimiyyətini Fransa və bütün Avropa üçün “Rusiyanın hərbi təhlükəsi mifini” manipulyasiya etməkdə, həmçinin “Qərb və Rusiya arasında hibrid müharibəyə çox milyard dollarlıq xərclərə haqq qazandırmaqda” ittiham edib.
“Fransa siyasi elitasının anqlo-saksonları razı salmaq üçün keçmişdə mövcud olan hərbi, siyasi və hətta intellektual suverenlik ənənələrinə qatılan bu rahatlıq və ehtiyatsızlığın haradan qaynaqlandığını anlamaq çətindir”, Rusiya XİN rəsmisi bildirib.
Qeyd edək ki, Makron fevralın sonunda Qərb qoşunlarının Ukraynaya göndərilməsinə çağırış edib. Daha sonra bunun üçün iki şərti açıqlayıb: Rusiya ordusu cəbhə xəttini yarıb keçməlidir, Kiyev isə müvafiq yardım sorğusu göndərməlidir. O, həmçinin bildirib ki, Rusiyanın Kiyev və ya Odessanı ələ keçirməsi təhlükəsi olarsa, Paris belə bir addım ata bilər.
Ukrayna Prezidenti Volodimir Zelenski bu təşəbbüsü alqışlayıb. Onun sözlərinə görə, xarici hərbçilər Ukrayna Silahlı Qüvvələrinin əsgərlərinə təlim keçə və texnikanın təmirinə kömək edə bilərlər.