Mark Esper: "Bizim üçün bu məsələ gündəlikdə deyil"
Pentaqon rəhbəri Mark Esper Türkiyə ilə hərbi münaqişəni istisna edib.
AYNA xəbər verir ki, "Türkiyə NATO üzrə uzunmüddətli partnyordur. Biz Türkiyə ilə döyüşə hazırlaşmırıq", - deyə o, CNN telekanalına müsahibəsində bildirib.
Qeyd edək ki, bundan əvvəl də ABŞ-ın müdafiə naziri bildirib ki, NATO Yaxın Şərqdəki müttəfiqi Türkiyəyə qarşı müharibəyə başlamaq niyyətində deyil.
"Yaxın Şərqdə NATO üzrə çoxdankı müttəfiqimizə – bizimlə birlikdə Koreyadan Əfqanıstana qədər vuruşmuş Türkiyəyə qarşı müharibəyə başlaya bilmərik. Bizim üçün bu məsələ gündəlikdə deyil", - Pentaqon başçısı deyib.
Daha əvvəl ABŞ-ın dövlət katibi Maykl Pompeo bildirib ki, Tramp ehtiyac olduğu halda Türkiyəyə qarşı hərbi hərəkətlərə hazırdır, amma Vaşinqton "dünyada sülh"ə üstünlük verir.
Qeyd edək ki, Türkiyə oktyabrın 9-da Suriyada PKK/YPG terrorçularına qarşı "Barış pınarı" antiterror əməliyyatına başlayıb.