İdarəetmədən çıxan bir tanker 180 sərnişin və heyət daşıyan kruiz gəmisinə çırpılıb
Hava nəqliyyatının idarəetmə sistemindəki texniki nasazlıq səbəbindən ABŞ-da saatlarla davam edən hava səyahətinin iflic olması fonunda ölkədə daha bir fövqəladə hadisə baş verib. Bu dəfə faciə suda yaşanıb. Missisipi çayında ehtimal ki, idarəetmədən çıxan bir tanker 180 sərnişin və heyət daşıyan kruiz gəmisinə çırpılıb. Gəmi çevrilib və batmağa başlayıb. Onlarla insan suda qalıb, lakin xilasedicilərin sürətli hərəkətləri sayəsində itki olmayıb.
AYNA.AZ xarici mediaya istinadən bildirir ki, Marşal adaları bayrağı altında üzən 160 metr uzunluğundakı “Atlantic Asphalt” tankeri körpüdə lövbər salmış “American Cruise Lines” şirkətinə məxsus beş göyərtəli çay gəmisi olan “American Heritage” ilə toqquşub.
2015-ci ildə inşa edilmiş və 150 sərnişin tutumuna malik kruiz gəmisi Missisipidə səkkiz günlük kruiz səfərini başa vururmuş. Gəmi toqquşmadan təxminən iki saat əvvəl lövbər salıb və sərnişinlər gəmidən düşməyə hazırlaşırmışlar. Liman rəhbərliyinin məlumatına görə, gəmidə 129 sərnişin və heyət üzvü olub. Yeni Orlean meri Helena Moreno bildirib ki, gəmidə təxminən 180-190 nəfər olub.
Hadisənin video görüntülərində böyük bir tankerin kruiz gəmisinə çırpıldığı görünür. Zərbə gəminin sürətlə suya qərq olmasına və batmasına səbəb olub. Bir neçə dəqiqə ərzində gəmi çevrilib və onlarla insan çaya düşüb.
Liman İdarəsinin polis rəisi Melani Montrollun sözlərinə görə, təxminən 87 sərnişin gəmi çevrilməzdən əvvəl onu tərk etməyi bacarıb. Qalanları sudan və batan gəmidən xilas edilib. Liman işçiləri, polis əməkdaşları, yanğınsöndürənlər, yedək gəmisi heyəti və yaxınlıqdakı gəmilər xilasetmə işlərinə tələsiblər. Xilasetmə əməliyyatı təxminən 19 dərəcə Selsi (66 dərəcə Farenheyt) çay suyunun temperaturunda baş tutub.
Təxliyədən sonra sərnişinlər sayım üçün liman binasına toplanıblar. Məlum olub ki, gəmidəki hər kəs xilas edilib. Merin sözlərinə görə, 32 nəfər xəstəxanalara aparılıb, lakin heç biri ağır xəsarət almayıb. Bir çox sərnişin sənədlərini, telefonlarını və şəxsi əşyalarını itirib. Şəhər rəsmiləri oteldə yerləşmə, yemək və qohumlarla əlaqə saxlamaq üçün yardım təşkil ediblər.
"Bu, Missisipidə əsl möcüzədir", - deyə Moreno heç kimin itkin düşmədiyini elan edərək bildirib.
İlkin nəzəriyyəyə görə, tankerin sükanı sıradan çıxıb. ABŞ Sahil Mühafizəsinin kapitanı Melani Börnhem bildirib ki, gəmi sükanı idarə etməyi itirib. Lakin qəzanın dəqiq səbəbi hələ müəyyən edilməyib.
Qeyd edək ki, ölkə miqyasında hava səyahətlərinin dayandırılması bu qəzanın araşdırılmasına da təsir edib. “Associated Press”in məlumatına görə, NTSB (Milli Nəqliyyat Təhlükəsizliyi Şurası) mütəxəssisləri Federal Aviasiya Administrasiyası tərəfindən tətbiq edilən dayandırma səbəbindən əvvəlcə Yeni Orleana uça bilməyiblər.
ABŞ Prezidenti Donald Tramp Sahil Mühafizəsinə, polisə və xilasetmə xidmətlərinə səylərinə görə təşəkkür edib. O, “Truth Social”da 32 nəfərin xəstəxanaya yerləşdirildiyini qeyd edərək "Belə ciddi toqquşmada heç kimin ölməməsi inanılmazdır" yazıb. Tramp həmçinin Luiziana qubernatoru Ceff Lendriyə fövqəladə hallar zamanı göstərdiyi liderliyə görə təşəkkür edib.