Qazaxıstandan gətirilən 22 ton xardal toxumunda da pozuntular aşkarlanıb
Latviya Qida və Baytarlıq Xidməti (FVS) Ermənistandan gətirilən 57,6 kiloqram yaşıl çay partiyasında Avropa İttifaqında (Aİ) qadağan olunmuş pestisid aşkar edildiyini açıqlayıb. AYNA.AZ-ın xarici mediaya istinadən verdiyi məlumata görə, laboratoriya testləri həmçinin iki digər pestisid səviyyəsini aşdığını aşkarlayıb.
8810 nömrəli partiyada Aİ-də istifadəsinə icazə verilməyən tolfenpirad olduğu bildirilib.
Bundan əlavə, lambda-sihalotrin və tiametoksam səviyyələrinin icazə verilən maksimum səviyyəni aşdığı qeyd edilib.
Yoxlamadan sonra göndərilən məhsulun Aİ-yə girişi rədd edilib. Bildirilib ki, bu partiyanın paylanması qadağandır: məhsullar məhv edilməli və ya Aİ xaricindəki bir ölkəyə göndərilməlidir.
Latviya xidməti aşkar edilmiş pozuntular barədə Avropa Qida və Yem üçün Sürətli Xəbərdarlıq Sisteminə (RASFF) məlumat verib. Bu sistem Aİ tənzimləyici orqanlarına təhlükəsizlik tələblərinə cavab verməyən məhsullar barədə məlumat verməyə imkan verir.
Eyni yoxlama zamanı başqa bir partiyada - Qazaxıstandan gətirilən 22 ton xardal toxumunda da pozuntular aşkar edilib. Onların tərkibində həddindən artıq miqdarda eruk turşusu olduğu aşkarlanıb. Bu partiyanın da Aİ-yə girişi qadağan edilib.