Qoşun kontingentləri "İstəklilər koalisiyası" təlimlərində iştirak etmək üçün Polşaya gələcək
Birləşmiş Krallıq, Almaniya və Fransadan qoşun kontingentləri "İstəklilər koalisiyası" təlimlərində iştirak etmək üçün Polşaya gələcək. AYNA.AZ xəbər verir ki, bu barədə Polşa hərbi xəbər agentliyi “Defence24” məlumat yayıb.
"Britaniyanın "The Times" qəzetinin məlumatına görə, bir neçə Avropa ölkəsindən - əsasən Birləşmiş Krallıqdan - ən azı 1500 əsgər bu ilin noyabr ayında Polşada keçiriləcək hərbi təlimlərdə iştirak edəcək. Bu tədbirlər Britaniya, Almaniya və Fransa qoşunlarını atəşkəs razılaşmasından sonra Ukraynadakı vəziyyəti sabitləşdirmək üçün potensial missiyaya hazırlamaq məqsədilə nəzərdə tutulub", - deyə nəşr yazıb.
"Bu təlimlər çoxmillətli əməliyyatlarda sürətli yerləşdirmə imkanlarını, logistikanı və komandanlıq koordinasiyasını sınaqdan keçirəcək. Məqsəd həmçinin müxtəlif ölkələrdən olan bölmələr arasında əməkdaşlığı gücləndirməkdir", - deyə qeyd olunub.
Təlimlərin "İstəklilər koalisiyasının" fəaliyyəti ilə əlaqələndirildiyi bildirilir.
“istəklilər koalisiyası” Birləşmiş Krallıq, Fransa, Almaniya, Kanada, Avstraliya, Baltikyanı ölkələr, Polşa, Sloveniya, İtaliya, İspaniya, Danimarka, İsveç, Finlandiya və digər ölkələri (30-dan çox ölkə) əhatə edən beynəlxalq bir ittifaqdır. Koalisiya Ukraynaya uzunmüddətli hərbi və strateji dəstək vermək üçün 2025-ci ilin mart ayında yaradılıb.