"Bizim üçün bu, ilk növbədə Rusiya reaktiv mühərrikli dronlarının ələ keçirilməsini əhəmiyyətli dərəcədə çətinləşdirməklə bağlıdır”
Ukrayna ordusu “Starlink” peyk internet xidməti olan “Starshield”in hərbi versiyasında bir daha məhdudiyyətlərlə qarşılaşıb. AYNA.AZ xəbər verir ki, bu barədə Ukrayna Prezidenti Volodimir Zelenski sosial media hesabında yazıb.
"Təəssüf ki, bölmələrimiz artıq bir neçə gündür ki, Ukrayna ərazisi üzərində “Starshield” xidmətində: bütün cəbhə xətti boyunca və müvəqqəti işğal olunmuş ərazidə əhəmiyyətli fasilələr qeydə alır", - deyə Zelenski qeyd edib.
Onun sözlərinə görə, “Starshield” 161 km/saat (100 mil/saat) sürətdən çox sürətlə siqnalını itirir. Ukrayna hərbçiləri sistemi sınaqdan keçirib və siqnal ötürülməsinin məhdudlaşdırıldığı qənaətinə gəliblər.
"Bizim üçün bu, ilk növbədə Rusiya reaktiv mühərrikli dronlarının ələ keçirilməsini əhəmiyyətli dərəcədə çətinləşdirməklə bağlıdır. Təəssüf ki, artıq zərbələr endirilib, çünki vurma sistemləri kifayət qədər sürətə çatmır və onları ələ keçirə bilmir", - deyə Zelenski vurğulayıb.
Prezident əlavə edib ki, Kiyev hazırda bütün halları Amerika tərəfi ilə aydınlaşdırmağa çalışır.
Oktyabrın ortalarında Ukrayna Silahlı Qüvvələri ilk dəfə olaraq “Starlink”in hərbi versiyası ilə bağlı problemlər barədə məlumat verib: peyk interneti saatda 130-161 km sürətlə dronlarda işləməyi dayandırıb. Bu, Ukrayna dronlarının istifadəsini ciddi şəkildə məhdudlaşdırıb və Ukrayna Silahlı Qüvvələri nümayəndələrinin sözlərinə görə, bir neçə vacib əməliyyatı pozub.
"The Telegraph"ın mənbələri bildirib ki, “SpaceX”in qurucusu İlon Mask ABŞ Prezidenti Donald Trampa Ukrayna ordusu üçün “Starlink” xidmətlərini azaltmağı təklif edib. Nəşrin mənbələrinə görə, Ağ Ev də razılaşıb və bundan sonra Pentaqon məhdudiyyətlər tətbiq edib. Bu, Trampın dayandırılmasını tələb etdiyi Ukraynanın Rusiya neft emalı zavodlarına zərbələri fonunda baş verib.
Mask özü iddia edib ki, “Starshield” sistemi hökumət tərəfindən idarə olunur və istənilən məhdudiyyətlər Trampa tabe olan ABŞ ordusu tərəfindən tətbiq olunur. Oktyabrın 22-də ABŞ Prezidenti “SpaceX”in Kiyevin “Starlink”ə tam girişini bərpa etdiyini açıqlayıb, lakin məhdudiyyətlərin qaldırılmasını kimin əmr etdiyi sualına cavab verməyib. Bu müddət ərzində Ukrayna Rusiyanın neft emalı zavodlarına zərbələr endirməyib, lakin oktyabrın sonlarında müntəzəm hücumlara başlayıb və son iki həftə ərzində ən azı doqquz neft emalı zavoduna zərbə endirilib.