Aleksandr Razuvayev: “Geosiyasi gərginlik qlobal bazar münasibətlərini dəyişir”
Qlobal səhmlər və ABŞ istiqrazlarının gəlirliliyi düşərkən, Rusiya qoşunlarının Ukraynanın Qara dəniz sahilindəki şəhərlərinə enişindən və Ukraynanın Moskvanın genişmiqyaslı işğala başladığını bildirməsindən sonra dollar, qızıl və neft qiymətləri yüksəldi. Əvvəlcə qızıl qiymətləri möhkəmlənən dolların təzyiqi altında enirdi, lakin geosiyasi vəziyyətin gərginləşməsi ilə əlaqədar qiymətli metalın qlobal kotirovkaları 1,7% bahalaşıb.
Beynəlxalq bazarlar Şərqi Avropada vəziyyətin pisləşməsinə əsəbi reaksiya verdi. Nyu-York “Comex” birjasında aprel fyuçerslərinin qiyməti qızılın 1 troya unsiyası üçün 32,55 dollar və ya 1,7% artaraq 1942,9 dollar olub. Gümüşün mart fyuçersləri 1,75% artaraq bir unsiya üçün 24,988 dollar olub.
Qiymətli metal cümə axşamı səhər təhlükəsiz sığınacaq kimi dəstək alır – bazarlar Rusiya Prezidenti Vladimir Putinin Ukraynaya qarşı xüsusi əməliyyatı elan edən bəyanatına belə reaksiya verib. Prezident Co Bayden isə öz növbəsində bildirib ki, ABŞ, onun müttəfiqləri və tərəfdaşları Rusiyaya qarşı sərt sanksiyalar tətbiq edəcək.
“Geosiyasi iğtişaşların artması bazar dəyişkənliyinin artmasına yol aça bilər ki, bu da qızıl kimi təhlükəsiz aktivləri dəstəkləməyə kömək edə bilər”, - deyə “Wall Street Journal” yazır.
Rusiyalı analitik, Maliyyə Analitikləri və Risk Menecerləri Gildiyasının Müşahidə Şurasının üzvü Aleksandr Razuvayev AYNA-ya şərhində deyib ki, geopolitikanın kəskinləşməsi fonunda bütün qlobal fond bazarı korreksiya edir: “Bundan əlavə, FED-in faiz artımı səhmlər, daşınmaz əmlak və s. üçün mənfidir. Eyni zamanda, qızıl devalvasiya və hiperinflyasiya təhlükəsinə qarşı xüsusi qoruyucu aktivdir”.
“Hesab edilir ki, vahid dünya valyutası peyda olarsa və ya onun prototipi BRİKS ölkələrinin valyutasıdırsa, o, qızıla və ya qızılla ifadə olunan qiymətli kağızlara bağlanacaq. Düşünürəm ki, uzunmüddətli investisiyalar üçün qızıla alternativ yoxdur – risklər çox yüksəkdir”, - deyə həmsöhbətimiz bildirib.
Amma bu, qızıl hasilatı şirkətlərinin səhmlərinə deyil, qiymətli metalın özünə aiddir. Çünki şirkətlər hələ də fond bazarlarının ümumi dinamikasına tabedir.
Razuvayevin sözlərinə görə, qızıl və gümüşün investisiya sikkələri kimi istifadəsinə dair maraqlı bir fikir də var: “Onlar o qədər də likvid deyil, lakin olduqca maraqlı bir hekayədir. Əmanətlərin bir hissəsini qızılda saxlamaq düzgündür. Məsələn, Rusiya Mərkəzi Bankının beynəlxalq ehtiyatlarının 20%-dən çoxu qızıldadır və bu, optimal nisbətdir. Məsələn, 30 il əvvəl SSRİ dağılanda qızıl ehtiyatı demək olar ki, yox idi. Qorbaçov və cənab Rıjkovun bu ehtiyatları hara qoyduqlarını hələ də heç kim bilmir”.
Bundan əvvəl iqtisadçı Vasili Koltaşov ruslara qızıla investisiya qoymağı məsləhət görüb. O, hesab edir ki, qızıl bahalaşacaq, ona görə də ona investisiya qoymaq lazımdır.
Eyni zamanda, analitik əlvan metallarla bağlı şirkətlərin səhmlərini almaqdan çəkinməyi tövsiyə edib. Qorxular özünü doğrultdu – cümə axşamı səhər dollar və avro rubla nisbətdə demək olar ki, 10% bahalaşaraq, tarixi maksimuma çatıb. Rusiyanın ən böyük şirkətlərinin səhmləri Moskva birjasında ticarətin açılışında çökdü.