Ödəniş olunan əlillərin sayı 14 mini ötüb
Prezident İlham Əliyevin tapşırığı ilə icra olunan yeni sosial dəstək proqramı çərçivəsində birdəfəlik ödəmə ilə təmin edilən müharibə əlillərinin sayı artıq 14 mini ötüb.
Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən AYNA-ya verilən məlumata görə, proqram 1997-ci il avqustun 2-dək hərbi xidmətdə olarkən aldığı xəsarət nəticəsində əlilliyi müəyyən edilmiş şəxsləri, onlardan vəfat edənlərin vərəsələrini əhatə edir. Onlara proaktiv qaydada birdəfəlik ödəmə təyin edildikdən sonra həmin vəsait bank hesablarına köçürülür və bu barədə SMS göndərilir.
Birdəfəlik ödəmə ilə təminatı prosesi davam edir.
E-sistemlərdə, habelə müvafiq arxivlərdə 1997-ci il avqustun 2-dək hərbi xidmət zamanı aldığı xəsarətlə əlaqədar məlumat olmadığı üçün proaktiv qaydada birdəfəlik ödəmə təyin edilməmiş şəxslər, habelə birdəfəlik ödəməni almaq hüququ olan şəxs vəfat etmişsə vərəsələri müvafiq sənədləri sosial.gov.az/post_576347 linkində qeyd edilən qaydada təqdim etdikdə onlara da həmin ödənişlər təyin olunaraq hesablarına köçürülür.