“Rusiya hələ də Ukraynada qeyd-şərtsiz atəşkəslə razılaşmayıb”
“Rusiya hələ də Ukraynada qeyd-şərtsiz atəşkəslə razılaşmayıb. Amma bu mövzuda ictimai olmayan söhbətlər davam edir”. AYNA.AZ xarici mediaya istinadən bildirir ki, bu sözləri Ukrayna Prezidenti Volodimir Zelenski aprelin 3-də Çerniqov vilayətinin ərazi icmalarının rəhbərləri ilə görüşündə deyib.
“Ruslar hələ razılaşmayıblar. Biz bunu görürük. Baxmayaraq ki, bu mövzuda amerikalılarla ruslar arasında söhbətlərin olduğunu bilirik. İctimai olmayan söhbətlər var və bu gün biz bəzi şeylərə nə qədər fərqli baxsaq da, amma təbii ki, amerikalılar və avropalıların öz maraqları var. Təbii ki, mümkün olan ən sürətli atəşkəs məsələsində biz hamımız birik”, - deyə Zelenski bildirib.
Onun fikrincə, atəşkəs Ukraynanın artıq razılaşdığı düzgün addımdır. Zelenski qeyd edib ki, əvvəlcə bu, bir-iki aylıq razılaşmalar ola bilər, lakin diplomatik danışıqlar üçün bir şansdır: “Bu, ölkələr üçün bu və ya digər dialoq formatı üçün diplomatik variantlara başlamaq üçün bir şansdır. Onlar həqiqətən fərqli ola bilər, tamamilə fərqli ola bilər. Bu, vaxt tələb edir. Bu dialoqlar zamanı heç kimin heç kimə təzyiq göstərməməsi üçün atəşkəsin olması vacibdir. Çünki əks halda bu, tamamilə yanlış görünəcək”.