Studiyada sinif otağı, səsyazma və peşəkar videomontaj bölmələri, prodüser otağı mövcuddur
Mədəniyyət və Sənətkarlıq üzrə Bakı Dövlət Peşə Təhsil Mərkəzində yeni inşa edilən televiziya studiyasının açılış mərasimi keçirilib.
Elm və Təhsil Nazirliyindən AYNA-ya bildirilib ki, açılış mərasimində qonaqlara televiziya studiyasının kameralar, işıqlandırma vasitələri, səsyazma cihazları və müvafiq köməkçi alətlər daxil olmaqla media sənayesində mövcud olan ən son texnologiyalarla təchiz edilməsi barədə məlumat verilib.
Studiyada sinif otağı, səsyazma və peşəkar videomontaj bölmələri, prodüser otağı, həmçinin 115 kvadratmetr çəkiliş sahəsi təklif edən səs keçirməyən divarlar mövcuddur. Studiya müasir və qabaqcıl öyrənmə mühiti yaratmaqla tələbələrə yaradıcı sənaye məhsulları istehsal etmək və peşə bacarıqlarını təkmilləşdirmək üçün dəstək məqsədi daşıyır.
Bildirilib ki, televiziya studiyasının rəqəmsal öyrənmə resurslarının inkişafı mərkəzinə çevrilməsi əsas hədəflərdən biridir. Bununla yanaşı, studiyanın müxtəlif sağlamlıq imkanlarına malik şəxslərin təliminə dəstək məqsədilə istifadəsi də nəzərdə tutulur.
Tədbirdə çıxış edən elm və təhsil nazirinin müavini İdris İsayev son illər ölkə miqyasında peşə təhsilinin inkişafı istiqamətində atılan addımlara diqqət çəkib və yaradıcı sənaye üçün kadr hazırlığının əhəmiyyətini vurğulayıb.
Birləşmiş Millətlər Təşkilatı İnkişaf Proqramının (BMTİP) Azərbaycandakı rezident nümayəndəsi səlahiyyətlərini icra edən Nuno Queniros isə qeyd edib ki, praktik və bazarın tələblərinə əsaslanan biliklərin öyrənilməsi üçün belə məkanların yaradılması olduqca əhəmiyyətlidir.
Qeyd edək ki, yenidənqurmaya dəstək fəaliyyətləri Avropa İttifaqı tərəfindən maliyyələşdirilən və BMTİP tərəfindən Peşə Təhsili üzrə Dövlət Agentliyi ilə birgə həyata keçirilən “Gələcək üçün peşə təhsili və təlimi: Azərbaycanda qabaqcıl peşə təhsili mərkəzlərinin yaradılmasına dəstək” layihəsi çərçivəsində təşkil olunur. Layihənin məqsədi əmək bazarının tələblərinə uyğun tədrisin təşkilinə dəstək olmaq və bu istiqamətdə Azərbaycandakı peşə təhsili müəssisələrinin müasirləşdirilməsinə yardım etməkdir.