Qofman Donald Tramp administrasiyasını İrana qarşı yeni hərbi əməliyyatlara başlamağa çağırıb
İsrailin Mossad kəşfiyyatının rəhbəri Roman Qofman Vaşinqtona səfər edib. Orada Qofman Donald Tramp administrasiyasını İrana qarşı yeni hərbi əməliyyatlara başlamağa çağırıb.
AYNA.AZ xəbər verir ki, bu barədə “The Wall Street Journal” öz mənbələrinə istinadən yazıb. Bildirilib ki, Qofman Tehranın nüvə proqramı ilə bağlı amerikalı kəşfiyyatçılara məlumat verib.
Mənbələr İsrail Baş naziri Benyamin Netanyahuya yaxın olan Roman Qofmanın Vaşinqtonda Tramp komandasının nümayəndələri, o cümlədən Mərkəzi Kəşfiyyat İdarəsinin direktoru Con Retkliff ilə görüşdüyünü bildirib.
Qofman İrana qarşı çoxgünlük hava hücumları təklif edib.
Qeyd edək ki, İsrail Baş naziri bir neçə aydır ki, İrana qarşı hücumların bərpasını tələb edir. O, İsrailin məqsədinin Tehranda rejim dəyişikliyi olduğunu iddia edir.
Lakin Qətərin rəhbərlik etdiyi Fars körfəzi ölkələri belə bir plana qarşı çıxırlar. Onlar İranın infrastrukturuna zərbələrlə cavab verəcəyindən qorxurlar, buna görə də bu ölkələr Tehranla razılığa gəlməyə çağırıblar, lakin hələlik heç bir nəticə əldə etməyiblər.
Tramp administrasiyası böyük müharibəyə ehtiyac olmadığını düşünür. ABŞ rəsmilərindən biri bildirib ki, İrana iqtisadi təzyiq yaxşı işləyir və ABŞ-a böyük döyüşlər olmadan məqsədlərinə çatmağa imkan verir.
Ekspertlər həmçinin zərbələrin İranı ABŞ ilə razılığa gəlməyə və ya hökumətini devirməyə məcbur edəcəyinə şübhə edirlər. Bəzi İsrail rəsmiləri də hərbi əməliyyatın faydalılığından əmin deyillər. Daha əvvəl, 12 noyabrda “Kan” televiziya kanalı ABŞ ordusunun İsraili İrana qarşı mümkün hərbi əməliyyat hazırlıqları barədə xəbərdar etdiyini bildirmişdi. Mənbələrə görə, Fars körfəzi ölkələri də oxşar xəbərdarlıqlar alıb. ABŞ Mərkəzi Komandanlığı bu məlumatları təkzib edib və onları “uydurma” adlandırıb. Lakin “Kan” televiziyası Vaşinqtonun o dövrdə Yaxın Şərqə hərbi texnika daşımağa davam etdiyini israr edib.