Kamran Əsədov: “Şagirdlər məktəbə eyni girişdən daxil olub, elə həmin girişdən də çıxmamalıdırlar”
“Məktəblərdə şagird və müəllimlər arasında koronavirusa yoluxma halları baş verib. Bu, gözlənilən idi. Çünki qabaqlayıcı tədbirlər yox həddindədir. Bu gedişlə 2 həftə sonra tədris prosesi dayandırılacaq”.
AYNA-nın xəbərinə görə, bu sözləri təhsil eksperti Kamran Əsədov deyib. Onun bildirdiyinə görə, bu gün Bakı şəhərində 30-dan çox məktəbin qarşısında monitorinq aparıb: “Müəyyən etdim ki, valideynlər məktəbə buraxılmır. Amma bu, həll yolu deyil”
“Şagirdlər məktəbə eyni girişdən daxil olub, elə həmin girişdən də çıxmamalıdırlar. Dərslər növbəli olduğuna görə bir qrup dərsdən çıxanda o biri daxil olur və qapının ağzında sıxlıq yaranır. Məktəbin bir neçə çıxışı istifadə edilməlidir”, - deyə K.Əsədov vurğulayıb.
Ekspertin qənaətincə, məktəbin qarşısında valideynlərin sıxlığının yaranmaması üçün xüsusi işarələnmə olmalı və valideynlər ancaq xüsusi işarələnmiş yerlərdə dayanmalıdırlar: “Bilirəm, bir az çətin olacaq, amma yaşlı şəxslərin şagirdləri məktəbə gətirməsinə bir müddət məhdudiyyət qoyulmalıdır. Mövcud vəziyyət davam etsə, 2 həftə sonra tədris prosesi yenidən dayanacaq”.
Qeyd edək ki, Təhsil Nazirliyi Bakıda müəllim və şagirdlərdə koronavirusun aşkar edilməsi səbəbindən 4 sinfin fəaliyyətinin distant formaya keçirildiyini açıqlamışdı. Həmçinin, 21 sentyabr 2020-ci il tarixinə olan məlumata görə, dərs ili başlayandan bu günədək 95 şagird və 26 işçi heyəti olmaqla 121 nəfər koronavirusa yoluxub. Həmin şagirdlərin əksəriyyəti yuxarı siniflərdə təhsil aldıqları üçün ümumi təhsil müəssisələrinə gəlməyiblər. Bu şəxslər ümumilikdə 346 nəfərlə təmasda olublar.