“Analiz nəticələri çıxdıqdan sonra ona reanimasiya şöbəsində yer ayrılıb və müalicəsinə başlanılıb”
Ötən həftə sosial şəbəkələrdə həkim Barat Bayramov və həyat yoldaşı Aygün Bayramovanın koronavirusa yoluxması ilə bağlı paylaşımlar geniş müzakirələrə səbəb olub. AYNA bildirir ki, məsələ ilə bağlı onların qızı Aynur Bayramlı tərəfindən paylaşım edilib. Paylaşımda o, valideynlərinin koronavirusa yoluxduğunu qeyd edib. A.Bayramlı iddia edir ki, koronavirusa yoluxan valideynlərinə qarşı münasibət o qədər də ürəkaçan deyil.
“Tibbi Ərazi Bölmələrini İdarəetmə Birliyi”nin (TƏBİB) mətbuat xidmətinin rəhbəri Rəvanə Əliyeva sözügedən məsələ ilə bağlı Oxu.Az-ın sorğusunu cavablandırıb. Onun sözlərinə görə, həkim Barat Bayramovun xəstəxanada koronavirusa yoluxması ilə bağlı iddialar əsassızdır: “Bizdə olan ilkin məlumatlara görə, həkim Barat Bayramov xəstəxanada yox, kənar yerdə koronavirusa yoluxub, virus ona ailə üzvləri arasında xəstəliyə yoluxan şəxslərin birindən keçib. İstənilən halda bu, ilkin məlumatdır. Amma Barat həkimin qardaşının da paylaşımları bu məlumatlarla bağlı onların heç bir şikayətinin olmadığını təsdiqləyir”.
R.Əliyeva həkim B.Bayramov və ailə üzvlərində koronaviursa yoluxan şəxslərin müalicə aldığını deyib: “Analiz nəticələri pozitiv çıxıb. Həmin gündən Barat həkim və ailə üzvlərinin aidiyyəti üzrə müalicəsinə başlanılıb”.
TƏBİB rəsmisi həkim B.Bayramovun müalicə aldığı xəstəxanada yaxşı şəraitdə saxlanılmadığı, hətta tibb işçiləri üçün olan kabinetlərdən birində qaldığına dair iddialara da aydınlıq gətirib: “Həkim Barat Bayramovdan analiz nümunələri götürülüb. Testin cavabları çıxana qədər isə həkimin vəziyyətində nisbətən pisləşmə müşahidə edilib. Nəticələr bəlli olana qədər onu xəstəxanada palatada yox, işçi otaqlardan birində yerləşdiriblər. Bu, sırf nəzarət məqsədilə olub.
Lakin həkimin müalicəsi o şəraitdə aparılmayıb. Analiz nəticələri çıxdıqdan sonra ona reanimasiya şöbəsində yer ayrılıb və müalicəsinə başlanılıb. Hazırda da onun müalicə prosesi davam etdirilir. Bu barədə həkimin özü ilə də danışılacaq və ictimaiyyətə dolğun informasiya veriləcək”.
