Əl-Bureyj Qaçqınlar Düşərgəsi və Deyr Belah bölgəsi vurulub
İsrail döyüş təyyarələri mühasirəyə alınan Qəzza zolağında müəyyən bölgələrə hava zərbələri endirib.
AYNA xarici KİV-ə istinadən xəbər verir ki, şəhərin şərq hissəsindəki Tuffah bölgəsinə edilən hücumda mülki yaşayış yerləri, Muhamməd Durra Uşaq Xəstəxanası və Əlillər Reabilitasiya Mərkəzi ziyan görüb.
Qəzzadakı mənbələrdən verilən məlumata görə, İsrail hava qüvvələri Qəzza zolağının mərkəzi hissəsindəki Əl-Bureyj Qaçqınlar Düşərgəsinə və şəhərdəki Deyr Belah bölgəsinə də hücumlar edib. İsrail ordusu "Twitter" hesabında verdiyi açıqlamalardan birində Həmas Hərəkatına aid raket istehsalının edildiyi yer, tunellərdən birinə və hərbi bölgələrdən birinin vurulduğunu iddia edib. İsrail ordusunun daha bir açıqlamasında Qəzzadan sərhədlərə paralel olaraq bəzi bölgələrə atılan iki raketin "Dəmir Günbəz" hava hücumundan müdafiə sistemi tərəfindən vurulduğu da ifadə edilib.