Vüqar Süleymanov: “Son 32 ayda 302 Azərbaycan vətəndaşı minaların və digər partlayıcı qalıqların qurbanı olub”
“2020-ci ilin noyabrından bu yana Azərbaycanın həyata keçirdiyi genişmiqyaslı minatəmizləmə əməliyyatları nəticəsində 81 min 386 hektar ərazi minalardan təmizlənib”.
AYNA xəbər verir ki, bu barədə Azərbaycan Minatəmizləmə Agentliyinin (ANAMA) İdarə Heyətinin sədri Vüqar Süleymanov Ağdamda “Mina Təhlükəsi ilə Mübarizə - Dayanıqlı İnkişafa Gedən Yol” mövzusunda keçirilən beynəlxalq humanitar konfransda açıqlama verib.
“Azərbaycan dünyada minalarla ən çox çirkləndirilmiş ölkələrdən biridir. Bu gizli təhlükələr insan faciələrinə səbəb olmaqla yanaşı, həm də sosial və iqtisadi inkişafa mane olur. Bu, həm də regionda sülh və sabitliyə ciddi maneədir”, - deyə o bildirib.
ANAMA rəhbərinin sözlərinə görə, ümumilikdə 88 260 mina və partlama təhlükəsi olan digər qalıqlar, o cümlədən 28 259 piyada əleyhinə mina, 15 303 tank əleyhinə mina və 44 698 partlamamış hərbi sursat aşkar edilib və zərərsizləşdirilib: “Əldə edilmiş irəliləyişlərə baxmayaraq, mina təhlükəsi hələ də qalır. Son 32 ayda 302 Azərbaycan vətəndaşı minaların və digər partlayıcı qalıqların qurbanı olub. Onlardan 57-si dünyasını dəyişib, 245 nəfər isə yaralanıb”.