Fermerlər Hindistanda magistral yolu bağlayıb
Hindistanda yeni əkinçilik qanunlarını ləğv etmək məqsədi ilə fermerlər etiraz aksiyalarına başlayıblar. AYNA xəbər verir ki, “Hindu” qəzetinin məlumatına görə, Pəncab və Haryana əyalətlərindən olan fermerlər paytaxt Yeni Delhi ətrafındakı 15 bölgədəki 33 magistral yolu bağlayaraq oturaq aksiya başladıblar.
Belə ki, fermerlər Hindistanda 2020-ci ilin sentyabrında əkinçilik sektoruna liberallaşma gətirəcəyi iddiası ilə qəbul edilən qanunların dəstək siyasətinə son qoyacağını və vasitəçi şirkətlərin qiymətləri endirməsi ilə kəndlilərin torpaqsız qalacağını iddia edirlər.
Hindistanın Baş naziri Narendra Modi isə yeni qanunların fermerlərə məhsullarını bazara çıxarma sərbəstliyi verdiyni, özəl investisiyalar hesabına isə təsərrüfatlarının böyüməsinə şərait yaradılacağını bildirib.
Qeyd edək ki, yeni qanunlardan sonra hökumət və fermerlər arasında aparılan danışıqlar nəticəsiz qalmış, hökumətin qanunları cəmi 18 ay müddətinə dayandırması təklifi də fermerlər tərəfindən rədd edilmişdi.