Ermənistan mediasının gülünc hiylələri: Xankəndidən yeni çağırışlar səslənir

Aktual

03.11.2021 - 13:29

Baş verənlər qarşı tərəfdə ciddi psixi sağlamlıq problemi yaşandığına dair əminlik yaradır

Baş verənlər artıq maraqlı yox, ən azı gülməlidir. Erməni mediası yenə də reallıqda hələ mövcud olmayan və baş vermə ehtimalı yüksək olanı müzakirə etmək qərarına gəlib. Onlar Rusiya KİV-lərinə istinadən bildirirlər ki, Rusiya, Ermənistan və Azərbaycan liderlərinin növbəti üçtərəfli görüşü noyabrın 8-9-da Moskvada baş tuta bilər, bu görüşdə sərhədlərin delimitasiyası və demarkasiyası, regional kommunikasiyaların açılması məsələləri müzakirə olunacaq.

Bu yerdə xatırlatmaq yerinə düşərdi ki, guya noyabrın 9-da Moskvada Azərbaycan Prezidenti İlham Əliyev və Ermənistanın Baş naziri Nikol Paşinyan tərəfindən imzalanacaq yeni sülh sazişi barədə ilk məlumatı, “etibarlı diplomatik mənbələrə” istinadən “Aliq Media” erməni resursu vermişdi. Xəbərdə təfərrüat da verilib.

Onlar deyirlər ki, Rusiya Prezidenti Vladimir Putinin vasitəçiliyi ilə Əliyev və Paşinyan iki sənəd imzalayacaq. Düzdür, o zaman hər şey həmin erməni mətbuatının o vaxt proqnozlaşdırdığının və digər erməni nəşrlərinin indi proqnozlaşdırdıqlarının əksinə getdi. Məsələn, rəsmi Bakı saxta olduğu ortaya çıxan məlumatı ümumiyyətlə şərh etməyib.

Rusiya Prezidentinin mətbuat katibi Dmitri Peskov isə bildirib ki, Rusiya-Azərbaycan-Ermənistan sammitinin keçirilməsi ilə bağlı razılıq əldə olunarsa, Kreml bu barədə vaxtı gələndə məlumat verəcək. Ermənistan XİN-in mətbuat katibi Vaan Unanyan bəyan edib ki, hazırda Ermənistan Baş nazirinin Azərbaycan Prezidenti ilə görüşü nəzərdə tutulmur. Onun sözlərinə görə, müxtəlif formatlarda görüşlərin keçirilməsi ilə bağlı təkliflər var, hazırda müzakirə olunur.

Bütün bunlara baxmayaraq, erməni mediası özünün yaratdığı feyk xəbər ətrafında müzakirələr açmağa davam edir. Onlar guya aydınlaşdırıblar ki, “demarkasiya və delimitasiya məsələsi Dağlıq Qarabağ münaqişəsinin gələcək həlli ilə birbaşa bağlıdır”.

Bu, artıq manipulyasiyadır. Çünki 44 günlük müharibənin nəticələrinə görə bu münaqişə artıq öz həllini tapıb. Ermənistanın Baş naziri Nikol Paşinyan isə bunu ötən il noyabrın 10-na keçən gecə üçtərəfli bəyanat imzalayaraq etiraf edib ki, bu da əslində İrəvanın kapitulyasiyasıdır.

Bu fonda, digər separatçılar kimi dünyanı yalnız Ermənistan vətəndaşı pasportu ilə gəzə bilən “Artsax Respublikasının xarici işlər naziri” David Babayanın “24News”a müsahibəsində səsləndirdiyi cəfəngiyyatları eşitmək daha gülməlidir. Çünki dünyanın heç bir ölkəsi, o cümlədən Ermənistan Respublikası da mifik “DQR”-i tanımayıb. İndi isə, 44 günlük müharibənin nəticələrinə görə, tanınacaq heç nə yoxdur.

Bu, Babayanın psixi sağlamlığı üçün əndişə yaradan açıqlamalar verməsinə mane olmur. "Biz öz torpağımızda olmuşuq, varıq və qalacağıq. Və mövqeyimiz dəyişməyib, Azərbaycanın bir hissəsi olmaq variantının əleyhinəyik, bu, bizim üçün qəbuledilməzdir. Bu, bizim hər zaman danışdığımız qırmızı xəttdir. Biz heç vaxt Azərbaycanın tərkibində olmayacağıq. Düşünürəm ki, bu, hamıya aydın olmalıdır”, - deyə o, bildirib

Bununla bağlı erməni mediasının bu yaxınlarda yerli QHT üzvü Aşot Arutunyana istinadən verdiyi mesajı xatırlatmaq istərdim. Onun sözlərinə görə, Qarabağ separatçılarının lideri Arayik Arutunyan qeyri-qanuni silahlı birləşmələri buraxmaq niyyətində olduğunu bəyan edib: “Mən ondan soruşdum: Bəs sizə kim belə hüququ verib? O, “Azərbaycanlılar tələb edirlər”, - deyə cavab verdi”.

Belə çıxır ki, David Babayan öz müdiri Arayik Arutunyanı təkzib edir. Bu, Qarabağ separatçılarının həyata keçirdiyi bir növ farsdır! Babayanın “biz heç vaxt Azərbaycanın bir hissəsi olmayacağıq” ifadələrinə gəlincə, Davidin özü haqqında, qohumları və dostları haqqında belə danışmağa haqqı var. Ola bilər ki, onlar Azərbaycanın bir hissəsi olmasınlar, yəni Xankəndini tərk etsinlər, necə ki, bu şəhərin minlərlə sakini artıq edib.

Amma hüquqi baxımdan Qarabağ həmişə Azərbaycanın olub. Azərbaycan isə BMT və digər beynəlxalq təşkilatlara məhz sovet vaxtındakı sərhədləri daxilində üzv oldu. Eynilə Ermənistan kimi. Bu, o deməkdir ki, Xankəndi bu təşkilatlarda və bütün dünya ictimaiyyəti tərəfindən Azərbaycan ərazisi kimi tanınır. Müvafiq olaraq, ordumuzun bir neçə saat ərzində uğurla həyata keçirə biləcəyi separatçıları sülhə məcbur etmək əməliyyatını bütün dünya, hətta Ermənistanın çoxdankı himayədarları belə, başa düşəcək.

Əgər Babayan və onun kimi Qarabağ separatçıları dediklərimizə qeyri-ciddi yanaşırlarsa, o zaman işğaldan azad edilmiş Şuşaya və ordumuzun qaytardığı digər ərazilərə baxsınlar. Yalnız keçən il sentyabrın əvvəllərində onlar hələ də işğal altında idilər. O zaman da Xankəndidən, İrəvandan çoxlu özünəinamlı bəyanatlar eşitdik. Ta ki, Nikol Paşinyanın “Qarabağ Ermənistandır və bu qədər” şücaətinə qədər. Hər şeyin necə bitməsi artıq hamıya məlumdur...

Müəllif: Əkbər Həsənov