Ukraynalı qaçqınların Amerikaya girişi üçün müraciətlərin qəbulu dayandırılıb
ABŞ Vətəndaşlıq və İmmiqrasiya Xidməti "Ukrayna üçün " (U4U) proqramı çərçivəsində ukraynalı qaçqınların ölkəyə girişi üçün müraciətlərin qəbulunu dayandırıb. AYNA xəbər verir ki, bu barədə xidmətin saytında bildiriş dərc olunub.
“20 yanvar 2025-ci il tarixli “Sərhədlərimizin mühafizəsi” Sərəncamına uyğun olaraq, ABŞ Vətəndaşlıq və İmmiqrasiya Xidmətləri I-134A Formasının, iştirak üçün onlayn sorğunun və maliyyə dəstəyi üçün müraciətlərin qəbulunu U4U-da bütün şərtləri nəzərdən keçirənə qədər dayandırır. Bu, sərəncamın tələblərinə uyğun olaraq həyata keçirilir”, - məlumatda vurğulanıb.
Bundan əvvəl “New York Times” (NYT) Ukrayna vətəndaşlarının müvəqqəti statusla Birləşmiş Ştatlara daxil olmasına icazə verən “əsas” təşəbbüsün dayandırılması barədə yazmışdı. Nəşrin məlumatına görə, 2023-cü ilin sentyabrına qədər 150 mindən çox insan bu proqramın iştirakçısı olub. Bu təşəbbüsə əsasən, ukraynalılar və onların yaxın qohumları ABŞ-da iki il qala bilərdilər. Eyni zamanda, Ağ Ev nümayəndələri NYT ilə söhbətində qeyd ediblər ki, bu cür proqramların şərtləri əvvəlcə Amerika qanunvericiliyinə ziddir. Ukraynadan başqa, onlar Kuba, Haiti, Venesuela və digər ölkələrin vətəndaşları üçün də keçərli idi.
Donald Tramp ABŞ Prezidenti kimi fəaliyyətə başladığı ilk gündə 42 sərəncam imzalayıb. Xüsusilə, o, ölkəyə gələn insanlar üçün sığınacaq proqramlarına düzəlişlər edilməsini və onun xarici siyasətinə zidd olanların dayandırılmasını əmr edib. Prezident həmçinin ABŞ ordusuna diqqəti ABŞ-ın cənub sərhədini qeyri-qanuni immiqrasiyadan qorumağa yönəltməyi tapşırıb və hüquq-mühafizə orqanlarından həbs edilmiş qeyri-qanuni mühacirlərin işlərinə immiqrasiya məhkəməsində baxılarkən onları azad etməyi tələb edən “tutub azad etmə” praktikasına son qoyulmasını tələb edib.
Tramp həmçinin ABŞ-da üçüncü ölkədən sığınacaq axtaran şəxslərin Meksikadakı işləri ilə bağlı məhkəmə qərarlarını gözləmələrini tələb edən “Meksikada qalmaq” siyasətini bərpa edib. Eyni zamanda, o, qaçqınların məskunlaşdırılması proqramlarını, ABŞ-da doğulmuş miqrantların uşaqlarına Amerika vətəndaşlığı verilməsini dayandırıb və Meksika ilə sərhəddə divarın yeni hissəsinin tikintisinə göstəriş verib.
Eyni zamanda, “Associated Press”in məlumatına görə, 22 ştatın baş prokuroru Amerika vətəndaşlığının doğum hüququ ilə verilməsini məhdudlaşdıran sərəncamın icrasına mane olmaq üçün məhkəməyə müraciət ediblər.