“Bütün bunların arxasında hansı planların dayandığını bilmirəm"
"Onlar yəqin ki, Qaribaşvilini yeni müxalifət kimi təqdim etmək istəyirlər. Bütün bunların arxasında hansı planların dayandığını bilmirəm". AYNA.AZ gürcü mediasına istinadən xəbər verir ki, bu sözləri Gürcüstanın beşinci Prezidenti Salome Zurabişvili “Facebook”da canlı yayımda keçmiş Baş nazir İrakli Qaribaşvilinin məktubu ilə bağlı sualı cavablandırarkən bildirib.
Zurabişvilinin sözlərinə görə, Gürcüstan hökuməti böhran içindədir və artıq istiqaməti yoxdur.
“Mən hər şeyi görürəm - xaos, böhran, bir-birimizə qarşı tam inamsızlıq, qisaslar... Bunlar haqqında uzun müddətdir danışırıq. Bu, yəqin ki, bu vəziyyətdən çıxmaq üçün bir növ siyasi oyundur. Bilmirəm, yəqin ki, onlar Qaribaşvilini yeni müxalifət kimi təqdim etmək istəyirlər. Yaxud bütün bunların arxasında hansı sxemlərin dayandığını anlamayacağıq. Çünki bunlar onların oyunlarıdır, amma bir şey aydındır: bu hökumət artıq hökumətə bənzəmir. O, dərin böhran içindədir və başsız toyuq kimi əvvəlcə bir tərəfə, sonra digər tərəfə qaçır, artıq istiqaməti yoxdur”, - Zurabişvili qeyd edib.
“Təəssüf ki, onlardan fərqli olaraq, Rusiyanın öz istiqaməti var və bu fonda onun hibrid strategiyası daha da asanlıqla gücləndirilir”, - sabiq Prezident əlavə edib.