Təyyarə komandiri Mahaçqala üzərində hava məkanının bağlanması ilə bağlı NOTAM bildirişi aldıqdan sonra dərhal geri dönmək qərarına gəlib
Bakı-Mineralnıye Vodı marşrutu üzrə J2-8717 reysini həyata keçirən “Azərbaycan Hava Yolları” QSC-nin (AZAL) təyyarəsi havaya qalxdıqdan az sonra yola düşmək üçün hava limanına qayıtmaq məcburiyyətində qalıb. AYNA xəbər verir ki, bu barədə AZAL-dan bildirilib.
Qeyd olunub ki, təyyarə komandiri Mahaçqala üzərində hava məkanının bağlanması ilə bağlı NOTAM bildirişi aldıqdan sonra dərhal geri dönmək qərarına gəlib.
Təyyarə yerli vaxtla saat 10:13-də Heydər Əliyev Beynəlxalq Hava Limanına təhlükəsiz eniş edib.
AZAL-dan onu da bildiriblər ki, yaxın vaxtlarda Rusiyaya uçuşlar barədə daha ətraflı məlumat veriləcək.
Xatırladaq ki, dekabrın 25-də AZAL aviaşirkətinin Bakıdan Qroznıya uçan “Embraer” təyyarəsi Qazaxıstanın Aktau şəhəri yaxınlığında qəzaya uğrayıb. Təyyarənin göyərtəsində 62 sərnişin, o cümlədən 37 Azərbaycan, 16 Rusiya, 6 Qazaxıstan və 3 Qırğızıstan vətəndaşı, həmçinin beş ekipaj üzvü olub. Hadisə nəticəsində 38 sərnişin ölüb, 29-u sağ qalıb.