2022-ci ildən bəri Rusiyada həbsdə olan keçmiş ABŞ dəniz piyadası Robert Gilman azadlığa buraxılıb
Rusiya hakimiyyəti 2022-ci ildən bəri Rusiyada həbsdə olan keçmiş ABŞ dəniz piyadası Robert Gilmanı azadlığa buraxıb. Prezident Vladimir Putinin xəstəlik səbəbindən ağır vəziyyətdə ola biləcək Gilmanın əfvini humanitar əsaslarla təsdiqlədiyi bildirilir. AYNA.AZ xəbər verir ki, bu barədə “Reuters” agentliyi ABŞ rəsmilərinə istinadən məlumat yayıb.
ABŞ rəsmilərinin məlumatına görə, Gilman və anası Nina çərşənbə axşamı günü Rusiyadan Vaşinqtona gedən ABŞ Dövlət Departamentinin təyyarəsində olublar.
“Reuters”in məlumatına görə, azadlığa buraxılma ABŞ dövlət katibi Marko Rubionun müvafiq xahişindən sonra baş verib və bu, 23 iyulda Rusiya xarici işlər naziri Sergey Lavrovla danışıqlar zamanı səsləndirilib. Vaşinqton Gilmanın təcili tibbi yardım ala bilməsi üçün onun azadlığa buraxılmasını istəyib. Azadlığa buraxılmış keçmiş dəniz piyadası ilə şəxsən danışan ABŞ hökumət rəsmisi onun müstəqil şəkildə gəzə və danışa bildiyini deyib.
Qohumları və insan haqları fəalları əvvəllər hərbçiyə dissosiativ stupor diaqnozu qoyulduğunu və qidalanma borusundan qidalandığını bildirmişdilər.
Mənbə bildirib ki, "hər şeyi nəzərə alsaq, o, yaxşı vəziyyətdədir".
Mənbələrə görə, Gilman uçuş zamanı dörd həkim tərəfindən müayinə olunub və enişdən sonra müalicə üçün Texasdakı reabilitasiya mərkəzinə aparılıb.
Rusiya müstəntiqlərinin fikrincə, Gilman 2022-ci ilin yanvar ayında Suxumi-Moskva qatarında polis məmuruna qarşı təcavüz və sərxoş vəziyyətdə nizam-intizam pozuntusuna görə həbs edilib. Məhkəmə əvvəlcə onu dövlət məmuruna qarşı zorakılıq tətbiq etdiyinə görə 4,5 il həbs cəzasına məhkum edib. Apelyasiya şikayəti üzrə cəza 3,5 ilə endirilib. Daha sonra Gilman barəsində həbsxana işçiləri və müstəntiqlə münaqişələrinə görə yeni bir iş açılıb. 2024-cü ildə yeni ittihamlarla yeddi il bir ay həbs cəzasına məhkum edilib.
Təxminən bir ay əvvəl Gilman Voronejdəki həbsxana xəstəxanasından mülki klinikanın psixiatriya şöbəsinə köçürülmüşdü. Anası və Amerika konsulluğunun nümayəndəsi xəstəxanada keçmiş dəniz piyadasını ziyarət etməyə icazə verilmədiyini bildirmişdilər.
ABŞ administrasiyasının rəsmiləri bildiriblər ki, Gilmanın azad edilməsi həftəsonu Amerika və Rusiya rəsmiləri arasında gərgin danışıqların nəticəsi olub. Lakin onlar israr ediblər ki, ABŞ Gilmanın azad edilməsi üçün rusiyalı məhbusları ekstradisiya etməyib. Bir rəsmi bildirib ki, "bu, xoşməramlılıq jestidir".
Həmçinin bildirilib ki, Gilman qayıdışından sonra onu ABŞ Prezidentinin xüsusi elçisi Stiv Uitkoff və Milli Təhlükəsizlik üzrə müşavir müavini Sebastian Qorka qarşılayıblar.