Natiq Cəfərli: “Yeni kommunikasiyalar olacaqsa, biznes imkanları yaranacaqsa, bölgədə sülh əldə ediləndən sonra xalqların rifahı yüksələcək”
Avropa İttifaqı Şurasının Prezidenti Şarl Mişel mayın 22-də Brüsseldə Azərbaycan Prezidenti İlham Əliyev və Ermənistan Baş naziri Nikol Paşinyan ilə keçirilmiş görüşün yekunlarına dair mətbuata açıqlamasında sosial-iqtisadi inkişaf məsələsi barədə danışıb. Deyib ki, Avropa İttifaqı tərəflərlə - Azərbaycan və Ermənistana birlikdə hər iki ölkənin və onların xalqlarının rifahı naminə iqtisadi inkişafı təşviq etməyə çalışan İqtisadi Məşvərət Qrupunun işini inkişaf etdirəcək.
"Mən, həmçinin əhalinin uzunmüddətli davamlı sülhə hazırlanmasının vacibliyini də vurğuladım və Avropa İttifaqı öz dəstəyini gücləndirməyə hazırdır", - deyə Mişel vurğulayıb.
Ermənistan-Azərbaycan münasibətləri məsələsində İqtisadi Məşvərət Qrupunun hansı rol oynayacağını AYNA-ya şərh edən ReAl Partiyası Siyasi Komitəsinin üzvü, iqtisadçı ekspert Natiq Cəfərli xatırladıb ki, Azərbaycan Şərq Tərəfdaşlığı ölkələri siyahısına daxildir:
- Avropa İttifaqı Şərq Tərəfdaşlığı ölkələri ilə zaman-zaman konsaltinq xidmətləri, birgə layihələrin işlənməsi, biznes layihələrinin reklamı ilə bağlı müəyyən işlər görür. Bunlar Azərbaycanla birgə də həyata keçirilmişdi. Amma 2010-cu ildən sonra bu sahədə zəifləmələr müşahidə edildi. İndi yeni dövr başlayır. Avropa İttifaqı həm Azərbaycana, həm Ermənistana 5 illik müddət üçün böyük vəsait ayırmaq qərarı verib. Yaxın illərdə iki ölkəyə birlikdə 4.5 milyard avro vəsaitin ayrılması gözlənilir.
Hesab edirəm ki, bu, ciddi vəsaitdir. Bu vəsaitin doğru-düzgün istifadəsinin müəyyənləşdirilməsi üçün Avropa İttifaqının ekspertləri ilə birgə qruplar yaradılacaq. Söhbət həm də regional layihələrdən gedir. Yəni ki, Azərbaycan ilə Ermənistan arasında Avropa İttifaqının vəsaiti hesabına kommunikasiyaların açılmasından, yol layihələrindən, yeni marşrutların açılmasından söhbət gedir. Avropa İttifaqı nəzərdə tutur ki, bu layihələrlə region xalqlarının iqtisadi-sosial rifahına töhfə verə bilər. Düşünürəm ki, bu, həqiqətən də inkişafa töhfə verəcək.
Ümumiyyətlə, yeni kommunikasiyalar olacaqsa, biznes imkanları yaranacaqsa, bölgədə sülh əldə ediləndən sonra xalqların rifahı yüksələcək. Bunun üzərinə də Avropa İttifaqının Ermənistana 2.3, Azərbaycana ayırdığı 2.2 milyard avro vəsaiti gəlsək, bu, kifayət qədər mühüm iqtisadi fürsətdir. Ayrılan vəsait iqtisadi dalğa yaratmaq üçün ciddidir.
- Bu layihələr sülhdən sonra üçün nəzərdə tutulur?
- Təbii ki, addımların böyük əksəriyyəti sülh müqaviləsindən sonra üçün nəzərdə tutulur. Amma sülhə doğru gedərkən də faydalı olacaq. Məsələn, kommunikasiyaların açılması ilə bağlı hətta yaxın həftələrdə işə başlanıla bilər.
- Bu, Avropa İttifaqı tərəfindən sülhə təşviq, həvəsləndirici addımdırmı?
- Məncə, bəli. Xüsusən, Ermənistan üçün bu, çox vacibdir. Söhbət az qala Ermənistanın dövlət büdcəsinə bərabər vəsaitdən gedir. Azərbaycan üçün də bu layihələr önəmlidir. Çünki Azərbaycan azad olunmuş ərazilərin bərpası üçün hər il 2.2 milyard manat vəsait ayırır. İki ildə bərpa məqsədilə 4.4 milyard manat vəsait ayrılıb. Donorların dəstəyindən, Avropa İttifaqının vəsaitləri hesabına yeni iş yerlərinin yaradılması istiqamətində əməkdaşlığın genişləndirilməsi, təbii ki, Azərbaycana da xeyirdir. Bu, həm də hər iki ölkə üçün müəyyən addımların tezliklə atılmasını stimullaşdıran tədbirdir.
- Azərbaycan azad olunmuş ərazilərin bərpasında bu vəsaitdən istifadə edə biləcəkmi?
- Məncə, bəli. Çünki orada kommunikasiyalarla bağlı məsələ var. Yeni yollar elə işğaldan azad olunmuş ərazilərdə çəkilir.