Partlayıcı qurğu yaşayış binasının girişin yanında dayanmış skuterə yerləşdirilib
Moskvada Ryazanski prospektində baş verən partlayış nəticəsində Rusiya Silahlı Qüvvələrinin Radiasiya, Kimyəvi və Bioloji Müdafiə Qoşunlarının rəisi, general-leytenant İqor Kirillov və onun köməkçisi həlak olub. AYNA xəbər verir ki, bu barədə Rusiya İstintaq Komitəsi məlumat yayıb.
Bildirilib ki, dekabrın 17-də səhər saatlarında Ryazanski prospektində yaşayış binasının yaxınlığında partlayış baş verib. Partlayış yerindən çəkilmiş fotolarda binanın girişində yerdə uzanmış cəsədlər görünür.
Fövqəladə Hallar Xidmətinin məlumatına görə, yaşayış binasının birinci mərtəbəsində baş verən partlayış nəticəsində iki nəfər ölüb. Qeyd olunub ki, binanın birinci mərtəbəsindən üçüncü mərtəbəsinədək şüşələr qırılıb, binanın giriş qapısı zədələnib.
Müstəntiqlərin fikrincə, partlayıcı qurğu girişin yanında dayanmış skuterə yerləşdirilib.
Kirillovun 54 yaşı vardı. O, 2017-ci ilin may ayından Radiasiya, Kimyəvi və Bioloji Müdafiə Qoşunlarının rəisi vəzifəsində çalışıb. Kirillov Böyük Britaniyanın sanksiyaları altındadır. O, Ukraynada kimyəvi silahdan istifadədə və dezinformasiyanın yayılmasında iştirakda ittiham olunur. Bundan əvvəl ABŞ və müttəfiqləri Rusiyanın Ukrayna hərbçilərinə qarşı zəhərli xloropikrin maddəsindən istifadə etdiyi qənaətinə gəliblər.
