Ərizələrin qəbulu iyunun 29-u saat 23:59-da başa çatacaq
Dövlət İmtahan Mərkəzi 2021/2022-ci tədris ili üçün Azərbaycan Respublikasının orta ixtisas təhsili müəssisələrinə ümumi (9 illik) orta təhsil bazasında tələbə qəbulu elan edib.
DİM-dən AYNA-ya verilən məlumata görə, orta ixtisas təhsili müəssisələrinə ərizələrin qəbulu iyunun 29-u saat 23:59-da başa çatacaq. Bu gün saat 11:55-ə olan məlumata görə, 30884 abituriyent (Azərbaycan bölməsi - 30039; rus bölməsi - 845) ərizəsini təsdiqlədib.
Qeyd edək ki, abituriyentlər DİM-in internet saytının ekabinet.dim.gov.az internet səhifəsində "Şəxsi kabinet" yaratdıqdan sonra şəxsi kabinetinin istifadəçi adı və parolundan istifadə etməklə DİM-in müvafiq internet səhifəsinə daxil olub, "Abituriyentin elektron ərizəsi" formasını doldurur və ərizəni təsdiq edirlər (etdirirlər). Müsabiqədə iştirak ödənişlidir.
Abituriyentlər ərizəni təsdiq etmək (etdirmək) üçün tələb olunan məbləği şəxsi kabinetlərindəki hesablarına əlavə edirlər. Həmin məbləğ ərizə təsdiq olunduqda onların şəxsi kabinetlərindəki hesablarından çıxılır. Abituriyentin imtahanda dövlət büdcəsinin vəsaiti hesabına və ya ödənişli əsaslarla iştirak etməsi barədə məlumat "Abituriyentin elektron ərizəsi" proqramı tərəfindən ona təqdim olunur.