“Ümid edək ki, Ermənistanla Azərbaycan arasında sülh sazişi hər iki tərəf üçün məqbul olan müddəalarla bağlanacaq”
“Gürcüstan Cənubi Qafqazda sülh və sabitliyin olmasını səmimiyyətlə istəyir. Biz buna nail olmaq üçün mümkün olan hər şeyi etməyə hazırıq. Əminik ki, regionumuz sabit, dincdir və firavan olacaq. Ümid edək ki, Ermənistanla Azərbaycan arasında sülh sazişi hər iki tərəf üçün məqbul olan müddəalarla bağlanacaq. Yalnız bu, regionda sabitliyin və davamlı sülhün əldə edilməsinin əsasına çevrilə bilər. Və regionumuzun potensialından istifadə etmək üçün yalnız bu təmələ güvənmək lazımdır".
AYNA erməni mediasına istinadən bildirir ki, bu sözləri Gürcüstan Xarici İşlər Nazirliyinin (XİN) rəhbəri Maka Boçarişvili İrəvanda Ermənistanın xarici işlər naziri Ararat Mirzoyan ilə keçirdiyi birgə mətbuat konfransında deyib.
Boçarişvili əlavə edib ki, regionda təhlükəsizlik problemlərindən danışarkən Gürcüstan ərazilərini işğal edən Rusiyadan qaynaqlanan çağırışları da qeyd etmək lazımdır: “Bu vəziyyətlə bağlı yaranan problemləri qeyd etməyə bilmərəm. Bunlar humanitar problemlər, iqtisadi problemlər və ağır sosial şəraitdir. Bu, Gürcüstan üçün çətin problem olaraq qalmaqda davam edir”.