“Psixoloji vəziyyəti yenidən qiymətləndirilib”
Ermənistanın siyasi rəhbərliyi tərəfindən Gəncə şəhərinə edilən hərbi cinayət nəticəsində hər iki valideynini və bacısını itirən 3 yaşlı Şahnəzərli Xədicə və onun yaxın qohumları bu gün Ailə, Qadın və Uşaq Problemləri üzrə Dövlət Komitəsinin nümayəndələri tərəfindən ziyarət edilib.
Komitədən AYNA-ya verilən məlumata görə, qurumun Gəncə şəhərində Uşaq və Ailələrə Dəstək Mərkəzinin mövcud olmaması səbəbindən Göygöldə yerləşən Mərkəzin əməkdaşları azyaşlı Xədicənin ata və ana qohumları ilə növbəti dəfə görüşüb və tərəflər dinlənilərək fikirləri öyrənilib: "Hər iki tərəf uşağı himayəyə götürməkdə maraqlı olduqlarını bildiriblər. Hazırda ana nənəsinin himayəsində olan Xədicənin psixoloji vəziyyəti yenidən qiymətləndirilib və əhval-ruhiyyəsinin yaxşı olduğu qənaətinə gəlinib. Azyaşlının qəyyumluğa verilməsi məsələsi haqqında aidiyyəti qurumlar tərəfindən uşağın ən yaxşı maraqları nəzərə alınmaqla qanuna müvafiq şəkildə qərar veriləcək. Qeyd edək ki, noyabrın 3-də komitənin nümayəndələri ailəyə baş çəkərkən kütləvi informasiya vasitələrində və sosial şəbəkələrdə yayılaraq narahatçılığa səbəb olan video ilə bağlı əməkdaşlarımıza məlumat verilmişdir. Bir daha nəzərinizə çatdırırıq ki, məsələ komitənin nəzarətindədir".