“Polis küçə ticarətinə göz yuma bilməz”

Cəmiyyət

26.07.2019 - 12:02

BŞBPİ: “Polisdən bu əmələ göz yumulmasını tələb etmək ictimai məsuliyyətsizliyi təşviqdan başqa heç nə deyil”

 

“Polisin küçə ticarəti ilə bağlı mübarizə tədbirlərini keçirməkdə əsas məqsədi cəmiyyəti bu məsələdə həssas olmağa səfərbər etməkdir. Çünki küçə ticarətinə qarşı ictimai baxış dəyişməlidir”.

 

AYNA xəbər verir ki, bu barədə Bakı Şəhər Baş Polis İdarəsinin (BŞBPİ) mətbuat xidməti məlumat yayıb. Bildirilib ki, ictimai fikir qanunsuz küçə ticarətini ümumi qəbul olunan davranış normaları çərçivəsində görə bilməz: “Çünki konkret səbəblər var: küçə ticarəti insan sağlamlığına zərər vurur, ətraf mühitin çirkələnməsinə, epidemoloji təhdidə, vergidən yayınmaya şərait yaradır. Bununla bağlı suallara bu sahənin mütəxəssisləri cavab verməklə, cəmiyyəti məlumatlandıra bilərlər”.

 

Qeyd olunub ki, küçə ticarəti ilə bağlı polisin tədbirlərini ictimai müzakirəyə çıxaran bəzilərinin subyektiv fikirləri ziddiyyətli yanaşmanın nümunəsidir və ənənəvi populizmdir: “Sağlam məntiq, sağlam düşüncə polisin qanunla üzərinə düşən vəzifələrinin yerinə yetirməsinin ictimai qınaq obyektinə çevrilməsinə çalışa bilməz. Polisdən bu əmələ göz yumulmasını tələb etmək ictimai məsuliyyətsizliyi təşviqdan başqa heç nə deyil”.

Müəllif: Ayna.az