Mehriban Zeynalova: “Bir neçə günə qızın gəlin aparılması haqda məlumat aldım”
Azərbaycanda rayonların birində yeniyetmə qızın məcburi ərə verilməsinin qarşısı alınıb. AYNA xəbər verir ki, bu barədə “Təmiz Dünya” Qadınlara Yardım İctimai Birliyinin sədri Mehriban Zeynalova “Facebook” profilində yazıb.
Zeynalova yazıb ki, bu gün səhər tezdən edilən zəngdə rayonların birində 14 yaşlı uşağın 27 yaşlı bir gənclə nişanlanması və bir neçə günə qızın gəlin aparılması haqda məlumat alıb.
“Dərhal Ailə, Qadın və Uşaq Problemləri üzrə Dövlət Komitəsinə bu barədə məlumatı ötürdüm. Günortaya artıq məlumat aldım ki, ailə ilə görüşülüb hüquqi məsuliyyət barədə ailə məlumatlandırılıb və ailə nəzarətə götürülüb. Görüş zamanı uşaqla ayrıca söhbət aparılıb. Uşaq təhsilini davam etdirmək istədiyini, lakin məcburi ərə verildiyini təsdiq edib”, - deyə Birlik sədri vurğulayıb.