Doqquz tankerə və onlarla əlaqəli səkkiz şirkətə sanksiyalar tətbiq olunub
ABŞ İranın "kölgə donanmasına" məxsus doqquz tankerə və onlarla əlaqəli səkkiz şirkətə sanksiyalar tətbiq edib. AYNA.AZ xarici mediaya istinadən xəbər verir ki, ABŞ Maliyyə Nazirliyi məhdudiyyətlərin İranda etirazçılara qarşı qəddarcasına basqınlardan sonra tətbiq olunduğunu açıqlayıb.
Siyahıya daxil olan tankerlər Palau, Komor və Panama bayraqları altındadır. Hindistan, Liberiya, Oman, BƏƏ, Marşal adaları və Seyşel adalarında qeydiyyatdan keçmiş bu gəmilərə sahib olan və ya onları idarə edən şirkətlərə də məhdudiyyətlər tətbiq olunub.
Bu gəmilərin və şirkətlərin yüz milyonlarla dollar dəyərində İran nefti və neft məhsullarının daşınmasında iştirak etdiyi iddia edilir.
ABŞ Maliyyə Nazirliyi bəyanatında İran xalqına məxsus olan bu gəlirlərin hökumət tərəfindən "regional terrorçu qrupları, silah proqramları və təhlükəsizlik xidmətlərini maliyyələşdirmək üçün" yönləndirildiyini bildirib.
"Bugünkü sanksiyalar İranın öz xalqını repressiya etmək üçün istifadə etdiyi vəsaitləri necə əldə etməsinin vacib bir hissəsini hədəf alır. Maliyyə Nazirliyi rejimin oğurladığı və İran xaricindəki banklara köçürməyə çalışdığı on milyonlarla dolları izləməyə davam edəcək", - deyə ABŞ Maliyyə Naziri Skott Bessent bildirib.
Qeyd edək ki, İranda etirazlar dekabrın sonlarında başlayıb və yanvarın birinci yarısında pik həddə çatıb. Əvvəlcə etirazçılar iqtisadi böhranla bağlı tələblər irəli sürsələr də, sonradan hökumətə qarşı şüarlar səsləndirməyə başlayıblar.
Ölkədə internet iki həftədir ki, bağlıdır və etirazçıların sayı və ya ölənlərin sayı barədə dəqiq rəqəmlər yoxdur - çoxsaylı hesablamalara görə, ölənlərin sayı minlərlədir. ABŞ-da yerləşən HRANA insan haqları təşkilatının məlumatına görə, etirazlarla əlaqədar 4900-dən çox insanın öldüyü təsdiqlənib.
15 yanvarda ABŞ etirazların yatırılmasında iştirak etməkdə ittiham edərək beş İran rəsmisinə qarşı sanksiyalar tətbiq edib. Siyahıda İranın Ali Milli Təhlükəsizlik Şurasının katibi Əli Laricani də var. Həmçinin Lorestan və Fars əyalətlərindəki regional polis bölmələrinin dörd rəisinə və İslam İnqilabı Keşikçiləri Korpusunun (SEPAH) komandirlərinə məhdudiyyətlər tətbiq edilib.