Donald Tramp: "Hanı mənim sevimli diktatorum?"
ABŞ prezidenti Donald Tramp avqustda "Böyük yeddilər"in (G7) Fransanın Biarrits şəhərində keçirilən sammitində misirli həmkarı Əbdül Fəttah əs-Sisini "sevimli diktator" adlandırıb.
Bu barədə cümə günü "The Wall Street Journal" qəzeti bildirib. AYNA "Report"a istinadən xəbər verir ki, Tramp Amerika və Misir məmurlarının iştirak etdiyi görüşdən əvvəl ucadan "Hanı mənim sevimli diktatorum?", - deyə soruşub.
Həmin vaxt zalda olmuş bir neçə nəfər nəşrə Trampın bu sözlərini eşitdiklərini təsdiq ediblər. Onlar həmçinin bildiriblər ki, ABŞ prezidenti bunları zarafatcıl tərzdə deyib.
Misir prezidentinin özünün Trampın replikasını eşidib-eşitmədiyi məlum deyil.
Ağ Ev bu mövzu ilə bağlı qəzetə şərh verməkdən imtina edib. "The Wall Street Journal" həmçinin Misir məmurlarından da şərh ala bilməyib.
G7 sammiti Biarritsdə avqustun 24-dən 26-dək keçirilib. Sammitdə Tramp və əs-Sisi Liviyadakı vəziyyəti müzakirə edib.