"Milli Həmrəyliyin və Sosial İnteqrasiyanın Gücləndirilməsi" adlı qanun layihəsi Türkiyə Parlamentində qəbul olunub
"Milli Həmrəyliyin və Sosial İnteqrasiyanın Gücləndirilməsi" adlı qanun layihəsi Türkiyə Parlamentinin 592 üzvündən 360-ı tərəfindən dəstəklənib. AYNA.AZ xəbər verir ki, bu barədə AFP məlumat yayıb.
Bildirilib ki, bu qanun layihəsi Türkiyədə terror təşkilatı kimi tanınan Kürdüstan Fəhlə Partiyasının (PKK) terrorçuları üçün qismən əfv nəzərdə tutur.
Böyük Millət Məclisinin (TBMM) üzvlərinin əksəriyyəti onu dəstəkləsə də, qanun layihəsi hələ də rəsmi olaraq səsverməyə çıxarılmalıdır.
Qanun layihəsi Türkiyə Prezidenti Rəcəb Tayyib Ərdoğan tərəfindən təklif edilib və o, bunun "Türkiyəni terror təhlükəsindən azad edəcəyini və milli birliyi gücləndirəcəyini" bildirib.
Qanun layihəsi PKK döyüşçülərinin normal həyata qayıda biləcəyini və partiyanın dağılıb bütün silahları hökumətə təhvil verməsi şərtilə təşkilat daxilindəki fəaliyyətlərinə görə cəzalandırılmayacağını nəzərdə tutur. Əfvdən "qəsdən adam öldürmə" və "1 iyun 2005-ci ilə qədər ömürlük həbs cəzası ilə cəzalandırılan cinayətlər" törətmiş şəxslər kənarda qalacaqlar.
1970-ci illərin sonlarından etibarən PKK əvvəlcə müstəqillik, daha sonra isə Kürdüstan muxtariyyəti uğrunda Türkiyə hökumətinə qarşı silahlı mübarizəyə başlayıb. 2025-ci ilin fevral ayında Türkiyədə həbsdə olan partiyanın qurucusu Abdullah Öcalan yoldaşlarını partiyanı buraxmağa və Türkiyə hakimiyyəti ilə silahlı münaqişəyə son qoymağa çağırıb. Həmin ilin may ayında PKK konqresi onu buraxmaq qərarına gəlib və daha sonra qüvvələrinin Türkiyədən çıxarıldığını elan edib.