Ekspert: “Qaimələri mütləq şəkildə tələb etmək və saxlamaq lazımdır”
Paytaxtımızda kifayət qədər kafe və restoranların fəaliyyət göstərməsinə baxmayaraq, nadir hallarda onların içi boş olur. Həftə sonları və axşamlar onların bir çoxunda boş yer tapmaq mümkün deyil.
Ancaq bu cür yerlərə gedənlər çox vaxt onlardan narazıdırlar. Keyfiyyətsiz yemək, aşağı səviyyəli xidmət və yüksək qiymətlər müştəriləri narazı salır.
Azad İstehlakçılar Birliyinin (AİB) rəhbəri Eyyub Hüseynov AYNA-ya deyib ki, bu problemlə əlaqədar Birliyə paytaxt və bölgələrindən müraciətlər daxil olur: “Həmin insanlar bəzi restoranlarda qiymətlərin çox yüksək olmasından şikayətlənirlər. Bu yaxınlarda AİB-ə məşhur Qəbələ restoranlarından biri ilə bağlı şikayət daxil oldu. Həmin şikayətdə qeyd olunurdu ki, restoranda onlara təklif edilən bir tikə ətə görə yüksək miqdarda pul istəyiblər. Müştərilər bir çox yerlərdə qiymətlərin əksini tapdığı menyunun olmadığından, qiymətlərin menyuda və qaimədə olanlarla üst-üstə düşməməsindən, bəzən isə qaiməyə əlavə ərzaq və ya içkilərin də qeyd edilməsindən narazıdırlar. Bundan başqa xidmətdən narazılıqlar edilir. Bu sahədə ciddi kadr problemi var. Təsadüfi insanlar çoxdur”.
Elya Belskaya