Nikoloz Samxaradze: “Biz Ukrayna ilə NATO arasındakı münasibətlərin dərinləşməsini alqışlayırıq”
Gürcüstan Parlamentinin Xarici əlaqələr komitəsi beynəlxalq ictimaiyyətə və xüsusən də NATO-ya Donbassdakı vəziyyətin gərginləşməsi səbəbindən Ukraynanın ərazi bütövlüyünü dəstəkləməyə çağırış edib. AYNA TASS-a istinadən bildirir ki, bu barədə komitə rəhbəri Nikoloz Samxaradze vurğulayıb.
Deputatın sözlərinə görə, Tbilisi ilə Kiyevi müxtəlif sahələrdə güclü dostluq münasibətləri və strateji tərəfdaşlıq əlaqələndirir: “Bu səbəbdən Gürcüstan rəhbərliyi Ukrayna suverenliyini dəstəklədiyini bir daha göstərir”.
“Biz Ukrayna ilə NATO arasındakı münasibətlərin dərinləşməsini alqışlayırıq və Alyansın Qara dəniz bölgəsindəki artan iştirakını dəstəkləyirik”, - Samxaradze bildirib.
Parlamentari Rusiyanın mövqeyinin Avropanın təhlükəsizliyi və Ukrayna sərhədləri üçün bir təhdid olduğunu vurğulayıb. O, Donbassdakı vəziyyətin gərginləşməsində Moskvanı günahlandırıb.