Yaqut Qarayeva: “Yoluxma sayında enmələr müşahidə edirik”
“Ən çox yeni yoluxmanı noyabr və dekabr aylarında görürdük. Bu zaman aparılan testlərdə 30 % pozitiv nəticələr var idi”. AYNA-nın APA-ya istinadən məlumatına görə, bunu Nazirlər Kabineti yanında Operativ Qərargahın bu gün keçirilən brifinqində Tibbi Ərazi Bölmələrinin İdarəetmə Birliyinin (TƏBİB) xəstəliklərin profilaktikası və kontrolu departamentinin müdiri Yaqut Qarayeva deyib.
Y. Qarayeva bildirib ki, yanvarın 18-dən Azərbaycanda vaksinasiya prosesi başlayıb: “Bundan sonra yoluxma maksimum 2000-2500-ə çatdı. Bu gün biz kəskin karantin rejiminə getmədən sosial həyatda bəzi aktivlikləri saxlayaraq, yoluxma sayında enmələr müşahidə edirik. Yoluxma əmsalı 10 %-ə yaxınlaşır. Bu, çox yaxşı vəziyyətdədir. Bu gün Azərbaycanda epidemioloji vəziyyət nəzarət altındadır”.
“Pandemiyanın ilk günlərindən bu günə qədər koronavirusa yoluxmanın yaş qruplarında vəziyyət dəyişməyib. Qadın və kişilər arasındakı bölgü də dəyişməyib. Ən çox yoluxma qadınlarda rast gəlinir. Rayonlarda bu gün diqqəti cəlb edən heç nə yoxdur, vəziyyət stabildir. Bakıda Binəqədi və Xətaidə yoluxmalar hər zaman yüksək olub. Bu gün ölkəmizdə epidemioloji vəziyyət stabildir. Karantin şəraiti və vətəndaşlarımızın qaydalara əməl etməsi bizi bu məqama çatdırıb”, Y.Qarayeva əlavə edib.