Sakinlər izdihamdan narazıdırlar: məhkəmə qərarını 12 noyabrda açıqlayacaq
Amsterdam sakinləri “TikTok”da məşhur olan “fast food” restoranı “Fabel Friet”ə lisenziya verən şəhər hakimiyyətinə qarşı məhkəməyə müraciət ediblər. Sakinlər turist izdihamından, zibildən və siçovullardan şikayətlənirlər.
AYNA.AZ xarici mediaya istinadən bildirir ki, on doqquz nəfər lisenziyaya etiraz edib. Runstraatdakı müəssisədə Parmesan pendiri və trüfel mayonezi ilə kartof qızartması satılır.
Məlumata görə, sıx günlərdə növbə Keizersgracht kanalının üzərindəki körpüdən keçir, müştərilər isə sifarişlərini gözləyir və başqalarının evlərinin qarşısında yemək yeyirlər.
İddiaçılar hesab edirlər ki, kiçik bina bu qədər çox sayda müştəriyə xidmət göstərmək üçün nəzərdə tutulmayıb. Onlar restoranın müştərilərin qapalı məkanda yerləşə biləcəyi bir yerə köçürülməsini istəyirlər. Sakinlər deyirlər ki, qida qalıqları küçəni çirkləndirir və qağayılar və siçovulları cəlb edir.
Şəhər Şurasının nümayəndəsi məhkəmədə etiraf edib ki, əgər biznes qonşuluqda yaşayış şəraitini pisləşdirərsə, mer lisenziyanı rədd edə bilər.
Hakimiyyət orqanlarının sonrakı hərəkətləri məhkəmənin qərarından asılı olacaq.
Müəssisənin sahibləri Abel Klatser və Floris Feilser gündə dörd dəfə işləyən təmizlik xidməti işə götürdüklərini bildiriblər. Dörd yeni məkan açıldıqdan sonra avqust ayında orijinal yeməkxanaya gələnlərin sayı ötən ilin eyni ayı ilə müqayisədə 23% azalıb.
Biznes sahibləri iddiaları ədalətsiz hesab edir və qonşularının maraqlarını nəzərə almağa çalışdıqlarını iddia edirlər. Sakinlərin vəkili də öz növbəsində mübahisənin ictimai məkandan istifadə ilə bağlı olduğunu vurğulayıb: dar küçələr bu qədər çox insanı yerləşdirmək üçün nəzərdə tutulmayıb.
Məhkəmə qərarını 12 noyabrda açıqlayacaq.