Bu gizli əməliyyat jurnalistlərin və Ağ Evin bəzi işçilərinin xəbəri olmadan həyata keçirilib"
İyulun əvvəlində ABŞ Prezidenti Donald Tramp İranla əlaqəli təhdid səbəbindən NATO sammitinin keçirildiyi Ankaranı gizli şəkildə hərbi nəqliyyat təyyarəsi ilə tərk edib. Baxmayaraq ki, Ağ Ev Amerika liderinin öz təyyarəsində olduğunu iddia edib. AYNA.AZ xəbər verir ki, bu barədə “The Washington Post” (WP) qəzeti məlumat yayıb.
Nəşrin məlumatına görə, "keçən ay İranın sui-qəsd təhdidi səbəbindən Prezident Donald Tramp onu gizli şəkildə Türkiyədən hərbi təyyarə ilə çıxarmağa tələsib. Ağ Ev isə onun “Air Force One” təyyarəsində uçduğunu iddia edib".
Nəşr yazıb ki, "əvvəllər xəbər verilməyən bu gizli əməliyyat jurnalistlərin və Ağ Evin bəzi işçilərinin xəbəri olmadan həyata keçirilib". Onlar "Prezidentlə eyni təyyarədə uçduqlarına inanıblar".
Ankarada NATO sammitindən sonra keçirilən mətbuat konfransında Tramp Qətər kral ailəsinin hədiyyə etdiyi yeni prezident təyyarəsi ilə Türkiyədən qayıtmayacağını, çünki onu Avropada nümayiş etdirmək istədiyini bildirib. Nəşrin məlumatına görə, Tramp Ankarada köhnə prezident təyyarəsinə minib, bu, jurnalistlər tərəfindən görüntülənib və videoya çəkilib. Lakin mənbələrə görə, "bir neçə dəqiqə sonra o, gizli şəkildə ABŞ Hərbi Hava Qüvvələrinin daha kiçik bir təyyarəsinə - C-32A hərbi nəqliyyat təyyarəsinə aparılıb.
Nəşrin məlumatına görə, Tramp adətən təyyarənin yola düşməsindən əvvəl ərzaq təchizatını yükləmək üçün istifadə edilən kiçik bir yük təyyarəsində aparılıb.
ABŞ rəsmi mənbəsi potensial hücumçulara qarşı "aldatma əməliyyatının" Tramp üçün İranla əlaqəli etibarlı bir təhdid səbəbindən həyata keçirildiyini vurğulayıb.
Nəşr qeyd edir ki, "İranın Amerika rəsmilərinə qarşı terror hücumları törətmək planları ilə bağlı narahatlıqlar onilliklərdir ABŞ hökumətində mövcuddur". Qəzet bildirir ki, bu, Trampa da aiddir.