"Kölgə donanması gəmilərinin iştirak etdiyi qanunsuz neft ticarəti Rusiyanın Ukraynadakı müharibəsi üçün vacibdir”
Avropa İttifaqı (Aİ) qüvvələri Aralıq dənizində Rusiyanın "kölgə donanması" ilə əlaqəli bir tankeri saxlayıb. AYNA.AZ xarici mediaya istinadən bildirir ki, bu barədə Aİ-nin Xarici İşlər üzrə Ali Nümayəndəsi Kaya Kallas deyib.
Kallasın sözlərinə görə, 30 avqustda Aİ patrulları Kamerun bayrağı altında üzən “MV Sun” tankerinə daxil olublar. Patrullar gəminin saxta bayraqla üzdüyündən şübhələnib və yoxlama üçün ona miniblər. Gəmi istintaq aparılana qədər saxlanılıb.
“Marinetraffic.com” saytının məlumatına görə, “MV Sun” 4 iyulda Novorossiyskdən yola düşərək Danimarkanın Skagen limanına gedib. Hazırda o, Aralıq dənizinin qərbindədir. Bu tip bir tanker 159.000 tona qədər neft daşıya bilər.
Kallas bildirib ki, bu, son aylarda saxlanılan beynəlxalq sanksiyalara zidd olaraq Rusiyaya neft daşıma xidmətləri göstərdiyi iddia edilən altıncı gəmidir.
"Kölgə donanması gəmilərinin iştirak etdiyi qanunsuz neft ticarəti Rusiyanın Ukraynadakı müharibəsi üçün vacibdir və biz bunu yatırmağa davam edəcəyik", - Kallas vurğulayıb.
O, həmçinin bildirib ki, "kölgə donanmasına" qarşı mübarizə Aİ müdafiə nazirlərinin 1 sentyabrda İrlandiyada keçiriləcək görüşündə müzakirə edəcəkləri mövzulardan biri olacaq.
Daha əvvəl Rusiya Prezidenti Vladimir Putin “kölgə donanması”nın gəmilərinin ələ keçirilməsini "soyğunçuluq və piratçılıq" adlandırmış və Rusiyanın bu cür hərəkətlərə "eyni şəkildə cavab verəcəyini" bildirmişdi.
“Reuters” agentliyi 2026-cı ilin əvvəlindən bəri Avropada doqquz belə tankerin saxlanıldığını, onlardan dördünün Fransada olduğunu bildirib. Adətən, gəmilərə sahib olan şirkətlər cərimələnir və gəmilərin özləri sərbəst buraxılır. Bununla belə, Aİ-nin saxlanılan gəmilərin yükünün müsadirə edilməsi mexanizmi də mövcuddur. Ukrayna öz növbəsində iddia edir ki, Rusiyanın “kölgə donanması”nın gəmiləri qanuni hərbi hədəf hesab edilə bilər.