Toy milyarderin Kaliforniyada üzüm bağları ilə əhatələnən malikanəsində baş tutub
Mart ayında 93 yaşı tamam olan Rupert Merdok rusiyalı iş adamı Roman Abramoviçin keçmiş qayınanası, 67 yaşlı Yelena Jukova ilə evlənib. Bu barədə AYNA xarici mediaya istinadən bildirir.
Toy Kaliforniyada, yəni media maqnatının Moraqadakı üzüm bağları ilə əhatələnən malikanəsində baş tutub. Toyda cütlüyün dostları və yaxınları iştirak edib. Sevinclə gülümsəyən Merdok və Jukova fotoqraflara pozalar veriblər.
“Starhit.ru” xəbər verir ki, dərin dekolteli təvazökar ağ paltar geyinən Yelena əlində mimoza buketi tutub.
Merdok və Jukova 2023-cü ilin yayından münasibətdədirlər. Onların nişanlanması ilə bağlı məlumatlar hələ bu ilin yazında mediada yazılmışdı. Eyni zamanda, sevgililərin iyunda evlənməyi planlaşdırdığı da bildirilir.
Rupert Merdok “The Sun”, “News Corporation”, həmçinin “Fox News” və “Wall Street Journal” kimi Amerika media nəhənglərinin rəhbəridir. Bu evlilik Merdokun beşinci evliliyi olacaq. Milyarderin ilk üç xanımından altı uşağı var.
Milyarderin dördüncü arvadı, model və aktrisa Cerri Holl 2022-ci ilin iyulunda ayrılmasına səbəb kimi “barışılmaz fikir ayrılıqlarını” əsas gətirərək onu tərk edib. Daha sonra Merdok radio aparıcısı Enn Lesli Smitə evlilik təklif edib, lakin 2023-cü ilin aprelində münasibətləri pozulub.
Jukova Merdokla qızı Daria vasitəsilə tanış olub. O, milyarderin keçmiş həyat yoldaşlarından biri Vendi Danqla rəfiqədir. Daria rusiyalı iş adamı, milyarder Roman Abramoviçin keçmiş arvadıdır.
Xatırladaq ki, Sovet İttifaqı dağılandan sonra Jukova Rusiyanı tərk edərək ABŞ-a köçüb. KİV-in məlumatına görə, SSRİ-də Mərkəzi Hematologiya və Qanköçürmə İnstitutunda işləyib - Jukovanın ixtisası molekulyar biologiyadır. Qadının ilk əri neft sənayesi sahibkarı Aleksandr Jukov idi. ABŞ-da Ylena ikinci dəfə - bioloq Georgi Qause ilə evlənib. 1999-cu ildən bu yana isə subaydır.